سافر...ومتطولش غيابك

سافر

اهدوا علي شوية واتطنوا خالص مش براء اللي سافر المرة دي هارحمكم من الكلام على براء اللي سافر أحمد ندا الله يمسيه بالخير ويبغدد خطاه وميحرمناش منه ولا من تعليقاته الفتيه على أعمالنا الفقيرة

ندا" سافر السعودية لوالده مش ارفعه في اول معرفتي به مكنتش باستلطفه قوي بس اكتشفت فيه بني ادم تاني خالص رقيق وبسيط وخواف كمان بيقول انه بيقلق مني قوي وانا متنرفزة من يوم سندوتش البطاطس

آخر يوم قعد هو وبراء ومصاعيبو ودريني وهواري وفؤاد انا تطفلت عليهم شوية وبعدها طلعت ع الازهر عشان اشوف الفرش بس بجد ندا افتقدناك ربنا يرجعه بالسلامة

النهارده عيد حبنا

كل سنة وانت طيبة.... امبارح كان عيد حبنا انتي نسيتي ولا ايه؟" قالها براء اول ما فاق من النوم اللي بيحبه اكثر مني على ما اعتقد كانت الساعة واحدة ونص بعد الظهر

طبعا انا منستش اليوم ولا انه عيد حبنا ولا حاجة لكن انا افتكرت امبارح ومرضتش احرج براء واحسسه انه نسي يوم مهم زي كده" الله اعلم " وفضلت اسكت وخلاص مشكده وبس لكن كمان عيد حبنا النهارده مش امبارح لان امبارح كان اول يوم نروح مكان مع بعض بعيدا عن الشغل

فاكر يوم حبنا يابيرو؟

الغريبة ان يوم حبنا مرتبط بشكل او باخر بمعرض الكتاب يومها براء باشا اتاخر على الصبح وكنت انا مستنية في عبد المنعم رياض وكان نايم برضه زي كل يوم يعني وقعدت انا ع الرصيف لاني مرحتش المعرض قبل كده ابدا ووصل اخيرا وركبا المين باص ورحنا المعرض

يومها اكتشفت ان براء ده شخص تاني خالص مختلف عن الكائن الغريب اللي احنا نعرفه في الشغل ، في المكتب تلاقي براء دايما يتكلم بسرعة وينقد الناس ويطلع في شغلهم القطط الفاطسه في الحقيقة براء انسان طيب قوي وبيتكسف جدا من الناس وخجول الى اقصى درجة وحنين قوي

يومها مكنتش اتخيل ابدا ان موضوع معرض الكتاب ده مترتب وانه محدد هدفه من بدري وعارف انه عايز يخلي والده اللي عنده مكان للعرض في معرض الكتاب يشوفني وتخلص الليلة من غير ما اعرف اي حاجة عن الموضوع

المهم من غير ما اطول عليكم حبينا بعض بسرعة البرق معرفش ازاي ومعرفش ايه اللي حصل بس المهم ان النهارده عيد حبنا

عمرو ورضوى.....اتجوزوا خلاص

بنت وولد مش لاقيه كلام أوصفهم به غير إنهم أجمل عروسين شفتهم في حياتي كانوا طايرين من الفرحة وطايرين بأصحابهم وحبايبهم في يوم فرحهم

مبروووووووووووووووووووووك

مبرووووووووووووووووووووك يا رضوى ومبرووووووووووووووووووك يعمرو انا فرحانة لكم قوي قوي قوي واله انتوا بجد تستاهلوا كل خير ربنا يتمم لكم على خير يارب

كلها بكرة بس وبعدة

بكرة وبعده بكرة وبعده واللي وعدني هايوفي بوعده "طبعا انا ولا فيه حد وعدني ولا حاجة يا جماعة عشان مفيش حد يفهم غلط بكرة وبعده دي الفترة اللي باقية في اقامة زوجي الجبرية في قنا خلال موسم الامتحانات وطحنة المذاكرة وخلاص ان شاء اله باقي له بس يوم الاربع ويرجع ينور الدنيا هنا تاني ويهز الليل والنهار بكلامه وافيهاته وحشني قوي

يار ييجي بسرعة بقى

اتسجن وبعدين اشتكي

مش قلت لكم ياجماعة انا مش متفاءلة ابدا بموضوع تحويل الظابط للتحقيق ولا صور الفجر المفتخرة بانها كشفت القضية والاحضان لعماد وخوف الظابط وخروجه من الباب الخلفي للمحكمة ياجماعة احنا لسه في مصر للاسف واهو ظني كان في محله بدل الظابط بن اللوا ما يتحبس ويتحاكم دخل السجن عماد الكبير بتمهمة مقاومة السلطات اللي مكنش عندها اي سبب عشان تقبض عليه وكمان قبضت عليه بشكل غير ادمي بالمرة عارفين فكروني بمسرحية شاهد مشفش حاجة "لما عادل امام كان بيتكلم عن تليفونه وان مصلحة التليفوزن قالت له عليك فاتورة فقال انه معندوش تليفون فقالوا له ادفع الاول وبعيدن اشتكي يا اما هانشيل العدة"

يانهار منيل ياجماعة ازاي يعني واحد يتضرب ويتسحل ويطلع عينه وبعدين يتحبس وقال ايه الصحافة خايفة انه يتعذب جوه السجن نعمين وحته طبعا لازم يتعذب اذا كان اتعذب في حته وفي وسط اهله يبقى مش هايتعذب في السجن اللي هو مملكة الظباط واهاليهم ده قليل ان مامات من التعذيب وهايقولوا انه انتحر...صبرنا يارب لك الله يابلدي

استرخااااااااااااااااااء

هدوءءءءءءءءءءءءءءءءءءءءءءءءءء

بكل ما تحمل الكلمة من معنى هدوء نفسي وفكري غريب أشعر به او قررت أن أشعر به برغم كل شيء برغم الشغل اللي مش راضي يخلص أبدا والزيارات العائلية وترنيبات الجواز والبرد وكل الحاجات .......

انا في أجازة من كل حاجة بس ياخسارة الاجازة يومين بس....! يعني يومين وراجعة

بس كان نفسي اقضي اليومين دول بصراحة بشكل مختلف يعني اسافر مكان فيه بحر لو اسكندرية يبقى حلو قوي واقعد على البحر طول التهار وأشرب نسكافيه وسحلب بالمكسرات وياسلام لو اوضة في فتدق ع البحر برضه واغمض عيني وانام زي ما انا كده واصحى بدري قوي اتمشى على الشط وكل الناس نايمة ولما الشمس تطلع احط طرحة على وشي وافضل طول النهار مكاني من غير أي نوع من أنواع الازعاج

يااااااااااااااااه حلم

بس انا كمان اخترت مكان ممتاز للاجازة بس سر بقى... يلا كل اجازة وانا طيبة

اسلام نبيه وقعت ياباشا

ربنا ع الظالم والمفترى وابن الحرام بس الواحد مش مصدق انه ممكن يتجازى ويتغير حاجة في جهاز الشرطة سامحوني ياجماعة انا مش يائسة ولا معادية للفرح بس انا خايفة افرح وملاقيش فايدة عموما انا هاعمل زي ما سمر قالت واحط الصورة وكلنا ورا ولاد الـ....... لحد مايظهر لنا صاحب
ولمن لا يعرف اسلام نبيه هو الضابط الذي اتهم بتتعذيب المواطن عماد الكبير في قسم شرطة بولاق الدكرور

براء...بجد ربنا يخليك لي

احساس غريب مش أول مرة احسه النهارده لكن المرة دي كنت لوحدي وانا واقفه على رصيف القطار في محطة الجيزة والقطار بدأ يتحرك مكنتش مركزة قبلها غير اني اخفف عنه حالة الاكتئاب المفاجئة اللي حاسس بيها من الصبح بس ياخسارة مشي القطار وملحقتش املي عيني منه

وحشتني يابراء" بجد وحشتني قوي كنت حاسه بيها وهو واقف قدامي على المحطة ومكنتش عارفه اعمل ايه ، دي مش اول مرة يسافر بس المرات التانية مختلفة كان فيه مقدمات وكان وضغعنا مختلف لكن دلوقتي احساس غريب قوي كأني أنا اللي سافرت دنيا تانية غريبة عني ومفيهاش حد ياخد باله مني

محدش يزعل انا عارفه ان فيه ناس كثير قوي بتحبني الحمدلله بس "براء" احساس مختلف ، لحد ما القطر مشي وانا ماسكة نفسي وجيت الشغل وفضلت طول النهار مش مركزة ودلوقتي بس عيني دمعت صحيح باتصل بيه واتطمن عليه وهو كويس الحمدلله لكنه سافر وانا فضلت هنا لوحدي
يارب تكون كويس

صدام حسين من غير قناع

صدام حسين

اسم ظلل يتردد في بلدتنا الصغيرة سنوات طويلة وقتها كنت طفلة صغيرة اتجول بين البيوت واستمع الى تلك الحوارات التي تدور دون ان افهم اغلبها ولكن ماعرفته انه رجل طيب يحب المصريين ويسهل عملهم في العراق هذه الدولة الغنية التي عاد كل من سافر اليها من قريتنا محمل بكمية لاباس بها من النقود والبعض رجع بالذهب والادوات الكهربائية والبعض الاخر رجع في نعش وقطعة من القماش الابيض ومغطى بعلم مصر الملون

وتمر السنوات لاكبر قليلا واعرف معلومات اكثر عن هذا الرجل ذو الملامح الجذابة والقسوة المرسومة على وجهه العابس دوما لاعرف انه غاوي حروب على حد قول خالي العزيز وهو كذالك اشجع حاكم عربي لانه يجاهر دوما برفضه لاسرائيل ووقوفه ضدها وكذالك امريكا

اكبر اكثر لادرك مع غيري من شباب هذا الجيل ماحل بالعراق من جراء هذا الحصار الذي دمر مواردها وعزلها عن الدنيا وياليتني ماكبرت الى ان ارى جنود الولايات المتحدة تملأ شوارع بغداد التي لم اشاهدها قط ولكنني تخيلتها قديما من حكايات الجيران وشاهدتها الان في صور الوكالات ونشرات الاخبار ولكنها منقوعة في دماء ابنائها

اما صدام الذي غاب عن ذاكرتي للحظات تذكرت فيها العراق فمازلت اذكر تلك الصور التي التقطوها له وهو خارج من مخبئه العميق الذي ظللنا نسمع الروايات حوله وهو منكوش الشعر وغائر العينين وممزق الملابس تائه النظرات وقتها رفعت صوتي وقلت"يستاهل غمل كثير وربنا يمهل ولا يهمل"

ولكن ما شاهدته اول ايام عيد الااضحى المبارك جعلني اتخلى عن كل تلك الاوصاف الشريرة التي وصفته بها واتذكر فقط ملامحه القوية ووجهه العاري بلا قناع وسط اقنعة قاتليه ولفافة حملت جسده الى مثواه الاخير

فرحل في يوم ننتظره من العام للعام لنشكر الله على نعمه ونحتفل بعيدنا واضحياتنا ولكن هذا العا م كان الجو مختلف لم نفرح بالعيد وحزننا لفراقه بالرغم من اننا كنا نتوقع هذه النتيجة ولكن ماشاهدناه فاق الوصف

رحم الله صدام حسين

انا متضايقة

انا متضايقة قوي........ودموعي اثبتت انها الصديق الوحيد

حبك حرية

بأحبها وساعات كثير بازعل منها قوي
بتوحشني كثير وبيوحشني ذكرياتي معاها
وأول ما توحشني أدور عليها
وألف كثير وازعل وانعزل عن كل الناس
لحد ما ألاقيها
واحضنها وألف بيها
وملحقش افرح
ألاقيها زعلتني ثاني
خلاص اتعودت على زعلي منها
بس لسه متعودتش على فراقها
وباقول لها
"حبك حرية"

يويو ويسر..إيه الحلاوة دي

الصورة اللي فوق دي فيها اثنين باحبهم قوي البنوته الجميلة دي مش متجوزة وده مش ابنها ولا حاجة يا جماعة يارت بلاش نفهم غلط هتستغربوا طيب امال هي حاضناه كده ليه وباين في عينيها الفرحة بيه اقول لكم لانه "يويو" ...!
"يويو" الجميل ابن اختها ياسمين زميلتنا في الشغل، وحشتينا ياياسو قوي ويو كمان وحشنا يارب ترجعي على خير وطبعا الخالة والدة برضه (والله وكبرتي وبقيتي خالة يايسر)

يوم في دريم بارك....

يوم جميل ومختلف مع ناس قريبين وناس نعرفهم من بعيد لبعيد بس في الحقيقة كان يوم جميل

يوم الخميس بالليل اتصل مصاعيبو ببراء وقال له ميعاد رحلة دريم بارك اللي عاملاها الشركة في الحقيقة كنا تعبانين لان الاربع والخميس كان فيه حالة وفاة في 8عائلة براء بس قلنا يلا اهو تغيير وكمان نشوف الناس

الساعة 6 الصبح صحيت بدري عشان اعمل السندوتشات وبصراحة كنت ناويةة الغي الفكرة بس مينفعش الجوع... وهواري ومصعب كانوا قتلوني لو عملت كده ونفعت السندوتشات وفضلنا طول اليوم ناكل بعد كل لعبة

في دريم بارك قام احمد رفعت بدور المرشد في المدينة اللي كنت اول مرة ازورها وكان مرشد شاطر ومفيد إلى اقصى درجة

لبعنا وبدانا بلعبة خطيرة قوي اللي هي " توب سباين" وانا كنت هاموت من الخوف وانا طالعة من اللي شفته بيحصل في الناس وخفت اكثر لما براء نزل لان الكرسي ضيق عليه وهو كان مبسوط قوي انه نزل لانه كان مرعوووووووب

نزلنا من اللعبة ورحنا نصلي الجمعة وبعدها نزلنا الشلالات وكانت جامدة قوي لدلاجة اننا لعبناها مرتين

اللعبة اللي جاية اخطر لبعة شفتها في حياتي هو صحيح فيه لعب كثير شفتها في دريم بارك زي قطر الموت والصاروخ بس دي اخطر واحدة جربتها وهي لعبة "الحلقة الدوارة" او الغسالة زي ما بيسموها في مصر اللعبة بتلف لحد ما تعمل 90 درجة وساعتها تبقى فوق وفجاة تبقى تحت بمنتهى الرسعة وانا فوق كنت مرعوبة بس غضلت مركزة انا لازم اقاوم واتحمل واجاهد عشان قلبي ما يقفش من الخوف كنت راكبة مع براء وفضلت اتكلم معاه واقوله اني مش هازعله تاني ابدا واني باحبه قوي و........

باقي الالعاب مكنتش اقدر العبهخا بس ريم الجامدة اختا مروة وداليا والهواري كان قلبهم جامد ومفغيش لعبة ملعبوهاش ربنا يقويهم بقى

اليوم خلص بسرعة وروحنا على الاتوبيسات واتلمينا عشان نروح كنا هلكانينن بس كان يوم جامد قوي يمكن عشان متفسحناش من زمان بس الاكيد ان الصحبة كانت حلوة قوي

ودلوقتي ممكن تسعدنا وتتفرج ع الصور

في سفارة الجزائر..كل تأشيرة وفيها تأخيرة

الجزائر..

بلد لم أزورها ولم احلم بزيارتها من قبل ليس لأنها بلد وحشة ولا بعيدة بس لأني مخرجتش من مصر قبل كده يعني أنا مسافرتش بره مصر ولا مرة في تاريخي وعشان كده لما الشغل رشحني للسفر الجزائر فرحت جدا واتمنيت أسافر

مكنش عندي جواز سفر ولا أي حاجة غير الدعوة اللي وصلت من المؤتمر وفي يوم واحد سافرت كفر الشيخ عشان اعمل الجواز والحمد لله تم بنجاح ومن غير تعقيد ورجعت القاهرة في نفس اليوم ورحت السفارة وهناك بدأت الإجراءات الروتينية..

المهم قدمت الدعوة ولسوء حظي كتبت في الاستمارة المهنة"صحفية" وكانت المصيبة الكبيرة اتعقدت الدنيا وانقلب الموضوع ورغم وعود ا "نجيب" سكرتير السفارة إني هاخد التاشيرة بكرة الصبح"الأربعاء يعني" إلا إني لم احصل عليها إلا يوم الخميس في الثانية ظهرا

ملحوظة: ميعاد الطيارة كان يوم الخميس الساعة 8.30 صباحا يعني ببساطة مسافرتش لان التأشيرة اتاخرت رغم إني كنت اشتريت التذاكر

وهنا بقى مشكلتين الأولى أن مفيش طيران للجزائر غير يوم الثلاثاء يوم الخميس يعني لو عايزة أسافر لازم استني يوم الثلاثاء الجاي وهو مستحيل لان المؤتمر ينتهي يوم السبت

المشكلة الثانية واللي بصراحة حرقت دمي إن التأشيرة صادرة بتاريخ 29-11 يعني يوم الأربعاء ومش الخميس...!

كل الآراء اجتمعت إن سعادة القنصل اللي هتلاقوا اسمه مكتوب على التأشيرة من تحت قرر انه يعاقبني لأني كنت صريحة وكتبت صحفية أو يمكن الصحافة عيب في الجزائر وكل تأشيرة وفيها تاخيرة

بين قوسين(..............)

فيه مواقف وكلام مهم بنحب نحطه بين قوسين يمكن عشان نبرزه ويمكن عشان نفضل فاكرينه دايما

لكن الغريب ان فيه كلام بتركز انك تنساه وتعمل نفسك مسمعتوش قبل كده وتلاقيه لوحده أتحط بين قوسين وفضل متعلق بذاكرتك وكان القوسين من مادة لازقة مش هتقدر تشيلها من مخك

الاغرب ان الكلام الوحش أو السيء بعنى اصبح هو الي بيعرف يعمل الحركة دي(اللزقان يعني) ونفضل نحاول نحركه وهو أبدا قاعد على قلبنا وعلى عقلنا

اللي عنده حل للموضوع ده ياريت يقول لي لأنه أصبح مشكلة كبيرة قوي

بيت الدمية بيتنا كلنا

في اليوم التالي لعقد قراني كانت الدعوة الأولى من زوجي العزيز إلى المسرح القومي لمشاهدة عرض عالمي للكاتب"هنريك ابسن" وهي من الأدب العالمي وترجمت إلى العربية وتقدم على المسرح القومي تقوم ببطولتها النجمة بوسي واشرف عبد الغفور

المسرحية طويلة وأحداثها مملة إلى حد كبير لأنك تجد نفسك طوال ساعتين ونصف تعيش في محيط بيت أو بالأصح صالة بيت"نورا" الزوجة اللطيفة الجميلة الصغيرة التي لاتقوم بأي عمل في حياتها سوى الاهتمام بزوجها وبيتها تهتم بملابسه وأطفالهما وطعامه وحياته مختصرة في راحته هو فقط وكانت تعتقد انه يبادلها نفس الشعور وهو يؤكد ذلك بالتدليل المبالغ فيه الذي يوجهه دوما

"نورا" زوجة ساذجة عادية لا تعمل تتغير حياته يوم عيد الميلاد لترقية زوجها التي ستغير حياته ماديا واجتماعيا ولكن جاءتها هدية أخرى وهي صديقتها القديمة كريستين" التي عادت من سفرها بعد موت زوجها تسير الأحداث ببطء حول تلك المشكلة التي وقعت فيها نورا من فرط حبها لزوجها الذي مر بفترة مرض وكانت تكاليف العلاج باهظة فاضطرت نورا أن تتصرف من نفسها واستدانت من شخص معروف بسوء الطبع والسلوك لتنقذ زوجها فكتبت إيصال أمانة على نفسها وزورت إمضاء والدها المريض أيضا في نفس الظروف وهو ما يعاقب عليه القانون.

تتطور الأحداث ليعرف زوجها ما حدث ويثور وينقلب حاله تماما ونورا التي كانت تعتقد ان زوجها سيثور خوفا عليها ويقف أمام الجميع ليفديها بنفسه ويقول انه المسئول وقف يعنفها ويلومها على فعلتها الشنيعة التي ستدمر مستقبله وتشوه صورته خاصة في وظيفته الجديدة لتفيق "العصفورة الصغيرة" كما كان يناديها على كابوس رجل عاشت مع سنوات طويلة دون أن تعرف عنه شيء

تنتهي المشكلة بان يبعث الرجل سيء السمعة التي اقترضت منه المال الإيصال الذي اقترضت بموجبه المال وينهي المسألة ليفرح زوجها ويطلب منها أن تنام وتنسى كل ما حدث وألا تفعل شيء بعد ذلك دون أن تستأذنه لأنها عصفورته الصغيرة التي لا تعرف شيء في هذه الدنيا الواسعة.

وقتها قررت نورا أن تتخلص من دور الدمية التي وضعها زوجها فيه لتكون أمراه حرة تعيش حياتها بطريقتها الخاصة لتترك المنزل وتذهب إلى بيتها القديم تعيش وحيدة لعلها تجد نفسها التي قتلتها لصالح حياتها الزوجية

كلنا دمى

في اليوم التالي حاولت التركيز في أغلبية المواقف بيني وبين زوجي المستقبلي فوجدتها تسير وفقا لنفس القاعدة أن تصبح المرأة هي عصب كل شيء لتفعل كل شيء من اجل إنسان واحد فقط تعيش من اجله وتلبي كل طلباته وتصبح السبب في كل أعبائه ولا تمثل أي دور في نجاحاته لأنه المميز القوي أذي يستطيع أن يكمل حياته بدونها في حين لايمكن حدوث العكس لأنها دوما تلعب دور الدمية لا الإنسانة

نصائح وجمل اتلاقاها منذ اليوم الاو ل في خطبتي عن كيفية التعامل مع الخطيب او الزوج او الرجل بشكل عام تحمل بشكل واضح مجموعة كبيرة من التنازلات والتضحياتن على كل المستويات لانني امراة يجب اتن اكون ضعيفة وقليلة الحيلة امام زوجي الهمام اتحلى بكلماته وارفض كل ما يكرهه

ياريت متفهمونيش غلط انا لست فتاة متحررة ولا ارفض وصاية الرجل علي بل بالعكس احبها واباهي بها ولكني ارفض انا اصبح دمية لمجرد اني امراة وارفض ان ارهق نفسي في علاقة لا يبذل هو ادنى جهد لنجاحها وفقط لانه رجل

مساء الهنا..يا وسط البلد

"مساء الهنا" هو رد على تحية ريفية مشهورة وهي مساء الخير اسمع أمي ترددها كثيرا خصوصا لو السيدة التي ألقت عليها التحية من صديقاتها أو لو كانت أمي سعيدة.

بالأمس شعرت لأول مرة منذ وقت طويل إني أردد "مساء الهنا يا وسط البلد" برغم كل ما شهدته الأيام الأخيرة من أحداث مؤسفة هناك إلا أنها بالأمس كانت جميلة إلى درجة جعلتني اشعر بالنشوة والحب والسلام

ذهبت إلى هناك بعد دعوة من براء لحضور مسرحية لفرقة الورشة في "التاون هاوس" في الحقيقة كنت متعبة جدا من عناء يوم عمل طويل بدأ مبكرا ولم ينته إلا في السابعة والنصف ولكني لا استطيع أن أرفض طلب زوجي المبجل انتظرت ميكروباص التحرير ووصلت إلى ميدان عبد المنعم رياض في الميكروباص كنت اشعر بالرغبة في النوم والحاجة إليه ولكن عندما لمست قدماي ارض الميدان شعرت براحة وفوقان.

أخذت أعد خطواتي على تلكم البلاطات المميزة التي تغطي الميدان وقبل أن أصل إلى تمثال الشهيد عبد المنعم رياض وجدت صوت اعرفه ينادي على "عاء...ولا أقول مدام دعاء" كانت رضوى الجميلة تمسك بيد عمرو خطيبها الهادئ وابتسامتها اتسعت أكثر عندما أخبرتها عن الفرح وكتب الكتاب ورغم أن التفاصيل كانت بسيطة إلا أنها فرحت كثيرا من اجلي، وتحدث عمرو عن العمل وعشرينات وأخر موضوعاتي وحدثتهم أنا عن آخر تدويناتهم

وبسرعة اضطررت أن استأذن لان الساعة كانت قد جاوزت الثامنة بعشر دقائق وموعد المسرحية كان في الثامنة ولمعت عيني عمرو ورضوى عندما علما بموعد المسرحية ولكن عناء يوم العمل أجبرهم هم أيضا على الرحيل فانصرفت وتركتهم مع شمس التي حضرت أيضا بالصدفة لتصرخ رضوى "يااااه معقول أقابلكم كده صدفة في نفس المكان"

مشيت في الشارع بسرعة ووصلت لبراء واتضح إن المسرحية ستبدأ في التاسعة وليس الثامنة وبالفعل كانت تستحق هذا العناء ومفيدة أكثر من النوم

انتهت المسرحية وقررت أن أغادر إلى البيت ولكن براء قرر أن يكمل يومه ومواعيده على البورصة فقد ارتبط بموعد مع دريني وفؤاد، وتبرع احمد نصر بتوصيلي إلى فيصل

عندما أغلقت باب السيارة شعرت باني محبوسة وودت لو رجعت في كلامي ونزلت من السيارة ولحقت ببراء الذي غادر بسرعة ولو رفض قضيت هذه الليلة على كوبري قصر النيل أو حتى متجولة في شارع طلعت حرب ولكن خجلي من نصر منعني من طلب النزول.

ولكني لم استسلم فعندما وصلت إلى شارع فيصل ركبت أول سيارة إلى التحرير ورجعت من جديد إلى وسط البلد، هذه المرة كانت فرحتى اكبر ولا اعرف لماذا اشتريت "كوز درة سخن" من شاب في موقف عبد المنعم رياض وعرفت انه يعمل هنا منذ 3 سنوات وهو في الأساس من أسوان وأخذت الكوز وانصرفت.

كانت ابتسامتي تعلو شفتي ولا اعرف سبب لذلك واغلب المرة قد شاركوني في أكل الذرة وتبادلوا الابتسامات معي وتجولت قليلا في شارع طلعت حرب ثم في شارع قصر النيل إلى أن وصلت إلى "قهوة البورصة" حيث يجلس براء ودريني وفؤاد، أكملوا حديثهم ثم انصرفنا ومازال بداخلي حنين إلى وسط البلد حتى الآن.

الحبر الفسفوري في الكوشة

ياريت يا جماعة ماتفهموش غلط الصورة دي مش تبع الانتخابات ومفيش اي علاقة بينها وبين الحزب الوطني دي صورة في يوم كتب كتابي وفي عز الفرح ماهو شغال والهواري غرقان في الرقص وبيرو مشغول في التليفون طلع المأذون الكوشة وقام بمهمته وخلاني ابصم على قسيمة الجواز وانا مصدقتش نفسي ساعتها وانا بالحبر الفسفوري وطبعا أحمد فؤاد مضيعش الفرصة واستغل الموقف احسن استغلال وصورنا الصورة اعلاه وفيه صور تانيه ممكن تتفرجوا عليها وتستمتعوا بالهواري وبراء وبقية الزملاء

العروسة والعريس

مستغربين صورة مين اللي فوق دي هتعرفوا حالا دي صورة الاستاذ احمد فؤواد الدين الذي تبرع وقام بدرو المصوراتي في الفرح

بروك ياعروسة...مبروك يامدام دعاء....معلش يا مدام مش هاقدر اجي الفرح

كلها عبارات وجمل سمعتها في يوم بالكامل وكنت مستغربة نفسي قوي وحاسه اني في حلم لكن الحق كنت فرحانة قوي وحاولت اركز إلى اقصى درجة.

ناس كثيرة بتتفرج علي العريس والعروسة وكل حركة محسوبة عليهم وكل العيونمتثبته على لون الفستان وزرار بدلة العريس

ودي تفاصيل اليوم بعدسة احمد فؤاد الذي تولى مهنة المصوراتي لمدة يوم واحد وتخلى عن عمله كصحفي تعالوا احضروا الفرح:

أنا في محاولة من ولاد عم براء انهم يصالحوني ويرقصوا معايا بعد رفض قاطع من ابن عمهم العزيز

العريس مشغول بالتليفون لكن الجديد انه مشغول مع والده اللي بيكلمه من نفس المكان بس من آخر الفرح

العريس وصل واول وصية من حماتي حبيبتي

عروسة وعريس

مصاعيبو رفيق درب بيرو وفرحة اخو العريس

العريس في عربية الزفة

دي اول اضافة للصور واحنا في انتظار المزيد من المصوراتي العظيم الاستاذ احم

شكراي ا احمد بيه على تعبك معانا بس نعمل ايه هو الواحد بيصاحب ليه يعني