الأحد، يناير 14، 2007

اتسجن وبعدين اشتكي


مش قلت لكم ياجماعة انا مش متفاءلة ابدا بموضوع تحويل الظابط للتحقيق ولا صور الفجر المفتخرة بانها كشفت القضية والاحضان لعماد وخوف الظابط وخروجه من الباب الخلفي للمحكمة ياجماعة احنا لسه في مصر للاسف واهو ظني كان في محله بدل الظابط بن اللوا ما يتحبس ويتحاكم دخل السجن عماد الكبير بتمهمة مقاومة السلطات اللي مكنش عندها اي سبب عشان تقبض عليه وكمان قبضت عليه بشكل غير ادمي بالمرة عارفين فكروني بمسرحية شاهد مشفش حاجة "لما عادل امام كان بيتكلم عن تليفونه وان مصلحة التليفوزن قالت له عليك فاتورة فقال انه معندوش تليفون فقالوا له ادفع الاول وبعيدن اشتكي يا اما هانشيل العدة"

يانهار منيل ياجماعة ازاي يعني واحد يتضرب ويتسحل ويطلع عينه وبعدين يتحبس وقال ايه الصحافة خايفة انه يتعذب جوه السجن نعمين وحته طبعا لازم يتعذب اذا كان اتعذب في حته وفي وسط اهله يبقى مش هايتعذب في السجن اللي هو مملكة الظباط واهاليهم ده قليل ان مامات من التعذيب وهايقولوا انه انتحر...صبرنا يارب لك الله يابلدي

هناك 8 تعليقات:

karakib يقول...

:) و اللي قتل ألف واحد و اللي باع دم مسمم و اللي خد الفلوس و ركب الطياره محدش قادر يسأل راحو فين
عماد الكبير محظوظ نسبيا و قبل ما يهاجمني حد باقول أه محظوظ نسبيا لأنه في زيه الاف الاف يهتك عرضهم يوميا و لا أحد يعلم عنهم شيئا
المشكله مش مشكله فرديه و عماد الكبير و الظابط الخايب لأ ده مبدأ و أحترام أدميه

الأباصيرى يقول...

مش عارف أقولك أية؟
أحنا بقى حالنا زبالة ولامؤاخذة

هنلاقيها من الحكام ولا من الضباط ولا من القضاة ولا من البلطجية

ممكن سؤال: مش دول القضاة اللى كنا بنطالب بأستقلالهم وكنا واقفين وراهم؟؟

أية اللى بيحصل دة!! هو القانون أن اللى يضرب ويغتصب كمان يتحاكم... على حد علمى المفروض ياخد تعويض مش ياخد حبس

شكلى ذاكرت القانون من كتاب غير الكتاب اللى ذاكروا منة القضاة

moody salihamidzic يقول...

حسبى الله ونعم الوكيل

مصـ( الخير )ـعب يقول...

أنا سمعت الخبر من شرقاوي... ونفسي اتسدت أوي ساعتها...

حسبي الله ونعم الوكيل
حسبي الله ونعم الوكيل
حسبي الله ونعم الوكيل

عبوووووووود يقول...

اللهم اجعل كيدهم في نحورهم
حسبي الله ونعم الوكيل فيهم
مش آن الأوان بقى نعمل حاجة عشان بلدنا

whyme يقول...

عماد اتضرب واتبهدل و كمان كان لازم يتسجن و يخرس علشان مفيش حد تانى يتجرأ و يعمل زيه

و يفرح لو حد نصفه لان مفيش حد يقدر ينصفك من جهل امه تحترف اغتصاب الحقوق
تحياتى

koukawy يقول...
أزال المؤلف هذا التعليق.
koukawy يقول...

حسبي الله و نعم الوكيل انا شفت الكليب بتاع لتعذيب صدفه و مقدرتش اكمل و كنت هجيب اللي في بطني
و اللي استفزني اكتر الحلقه بتاعت عمرو اديب و اللي قاله مساعد وزير الداخليه
شئ غير انساني