السبت، مارس ٣١، ٢٠٠٧

كركور...يا يعيش

عمر اخو مصعب وهو في حضن كركورنا
كركور اول فرحتنا
كركور الحلو وجزء من الفوتيه وانا كنت تقريبا نايمة بعدسة رفعت
كركور الجميل....هو اسمه كده كركور بصراحة الفضل يرجع لبراء في اقتناء كركور الحلو الكميل التخين ده يومها كنت باشتري حاجات للبيت من سوبر ماركت الشريف وبعدين براء سابني سارحه في ملكوت الشمعدان والصواني وهو دخل قسم الاطفال وهاتك يافرجة وكل شوية انادي عليه يابراء من فضلك ممكن تقول لي رايك في الحاجة الفلانية وهو ولا على باله.

يومها ضحكت قوي مكنتش اعرف ان براء له في لعب الاطفال وقبلها بيوم كان عمال يتكلم ويقول مش لازم نخلف بعد الجواز انا لسه صغير وعايز استمتع بحياتي والكلام ده يومها قلب خالص وقال عايز اخلف حالا الللعب حلووة قو يانا عايزاخلف عيال عشان العب معاهم المهم طلعنا من السوبرماركت بكركور بعد محايلة وضغط على اعصابي من براء هو عارف اني باحب الدباديب قوي وانا عندي كثير قوي البيت تويتي وخوخه وقطط وعرايس كثير وارانب بس بصراحة ضعفت واشتريناه بمبلغ محترم يعني بس كان اول حاجة نشتريها عشان احنا عايزينها لينا نستمتع بيها من غير ما اي .حد يتدخل فيها ...على حد وصف براء في المحل وبعد ما شاتريناه قعدنا نفكر واطلقنا عليه كركور ليحتل مكان مميز في غرفة براء المفضلة(الانتريه) بين الفوتيهين اللي انا باحبهم ..باختصار انا باقول عليه اول فرحتنا..

الولد عمر بيحبه قوي وكل ماييجي عندنا يقعد يقنعني انه وحش قال يعني ممكن اسيبه له



حاااااااااااااااااسب ع النيش

النيش هو اللي على ايدك اليمين وانت في الصورة للاسف مكنش فيه كاميرا يوم الفرش هو واضح يعني بس مسيري اصوره لكم
انا مشغووووووووووووووووووولة قوي قو ي قوي سامحوني والله مش عارفه ادون مع اني عندي حكايات كثير قوي نفسي افضفض واحكيها بس بصراحة اهم موضوع شاغلني دلوقتي هو موضوع النيش اصلي عقبال عندكم كلكم يا بنات ويا ولاد فرشت الشقة يوم الخميس هي لسه مخلصتش فرش طبعا بس اهلي بقى راحوا اتفرجوزا وفرشوا الدولاب ووزعنا الدولاب بيني وبين براء واتخانقنا على مكان الهدوم وحركات العيال دي بس اكثر حاجة قلقانة عليها النيش ...1 اصل انتوا يمكن متعرفوش الحكاية اصل النيش ده فيه اعز ما املك فيه الصيني والاركوبال والكاسات والفناجين الحلوة وكمان فيه شنطة المعالق يا جماعة.

من يوم ما فرشنا وانا كل يوم احلم اني هاروح الاقي النيش وقع بكل الحاجات اللي فيه مع اني سمعت كلام امي وحطيت حاجات قليلة قوي فوق الرفوف الزجاج وحطيت الباقي كله تحت على الخشب بس برضه خايفة


المهم بقى يوم العفش براء ربنا يكرمه كان واقف معانا(عشان يعدل علينا طبعا اصل انتوا متعرفوش جوزي عنده اراؤه وحكاياته الخاصة) وشوية شوية بعد الغدا دخل اوضة الانتريه بعد ما فرشنا ونااااااااااااااام نوم عميق وانا فضلت اضحك وصعب علي قوي جبت اللحاف الفيبر الحلو وغطيته وسبته مصحيش غير لما خلصنا خالص

المهم ادعوا لي النيش ميقعش وكمان ربنا يهدي سري انا وبراء عشان بقالنا اسبوع بنتخانق وباعيط كثير قوي لدرجة اني قربت ادخل في حالة اكتئاب واول مرة اخاف من الجواز ومن الرجل في حياتي حاسه ان الموضوع مش زي ما كنت فاهمه ...بصوا هابقى احكي لكم تاني اصلي لازم انزل حالا

الخميس، مارس ٢٢، ٢٠٠٧

اسماعيلية والفول الحراتي

اسماعيلية....انا مكتبتش عنها غصب عني والله ده كان يوم اكثر من رائع انا رجعت وكاني واحدة تانية خالص لدرجة اني حاسه ان اللي فات ده مش اسبوع ده شهر الايام بعد يوم اسماعيلية ده بقى ستين يوم في بعض .
قبلها بيوم كنا في معكركة مسح الشقة وتنظيفها وطبعا دي معركة استمرت حتى منتصف الليل وبراء كالعادة باعني وسابني اغسل الارض واحك في السيراميك وقعد يغني لي " والله يازمن لا بايدينا زرعنا الشوك" ويقلب في الاغاني ع اللابتوب وكل ساعة كده ييجي يدلق دورق ميه المهم تعبت فعلا ومع ذلك صحيت بدري قوي لان الميعاد كان 9 الصبح عند المرج الجديدة وبالفعل صحيت 7 الصبح وبيرو اتصل وقال مش قادر اقنعته ونزلنا رحنا .
ووصلنا 10 المهم وصلنا اسماعيلية وبدات التفاصيل طبعا انا اول ما شفت الفول الحراتي زقططت من الفرحة ورحت اجمع الفول الجميل على فكرة يا جماعةو الاكل من ارض حد مش حرام لو انت جعان ده كلام امي الغالية وبعدها لقيت غيط بصل اخضر معرفتش امسك نفسي رحت قاطعة بصلاية وجبت رغيف عيش من الكيس اللي مع علاء وحطيت عليه كاتشب كان في شنطتي واكلت وكان طعمه هايل
وصلنا البيت والبهوات قعدوا يلبعوا فيفا وعاملين فيها في كاس العالم المهم طبعا بم اننا في مجتمع ذكوري(.....) بلا ش شتيمة عشان اليوم ده كان حلوي هم قعدوا يلعبوا واحنا دخلنا المطبخ وعينكم ما تشو الا النور اختكم اميرة دخلت في صراع مع صواع الكفته ودعاء فقدت الذاكرة
اه انتا نسيت اقول لكم ان اليوم ده كنا معزومين عليه من علاء باشا ودعاء اخته الكميلة اللطيفة دي، نكمل بقى دخلنا المطبخ وكل ما اسال دعاء على مكان حاجة تقول لي مش عارفه اسالي علاء كنت هاموت من الغيظ بس قعدت اضحك اصلي عارفه دودو الجميلة وطبعا الرسالة وصلت وعرفت ان مالهاش في المطبخ خالص بس الحق يتقال البت غلست المواعين كلها طبق طبق
اميرة شغالة يعني بتعرف تعمل حاجات لطيفة واا كنت زهقانة من نفسي قوي عشان باعرف اطبخ كان نفسي ابقى مبعرفش عشان ما ابقاش ام العيال بقى والست اللي عارفه خلصنا تتبيل الفراخ وتصبيع الكفتة وعمايل المكرونة والملوخية وهم لسه بيولوعوا النار كنت عايزة اولع فيهم لان الاكل اتاخر قوي على ما خلص
المهم اكلنا وشبعنا قوي والحمد لله وقعدنا نلعب لبعة الصراحة وانا مبطلتش لعب سوليتير فرصة بقى براء مشغول مع صحابه وقلنا كلام لطيف قوي وبالفعل الاراء كانت مفيدة ورجعنا يوميها كلنا بنحب بعض اكثر وفاهمين بعض اكثر بكثير قوي من قبل كده
ياخبر نسيت اخطر حاجة في اليوم خطبة الجمعة للشيخ الزنديق احمد ندا ...قال ايه اختاروا ندا يخطب وكانت شورة قال اربع كلمات مثلا والباقي سكوت والاربع كلمات ثناء وصلاة على النيبي صلى الله عليه وسلم وانا كنت هاموت من الضحك كنا البنات واقفين وراهم طبعا بس كنت هافطس بجد كانت خطبة هايلة بحيث ان الصلاة والخطبة وكل حاجة استغرقت على الاكثر 10 دقائق منهم 9 دقائق سكوت في الخطبة
بس يا خسارة اليوم كان ناقصة شوية ناس مهمين قوي قوي قوي على راسهم رفعت باشا طبعا بكاميرته الخفية اللي بترصد كل تحركاتنا ، وكان ناقصة هواري ولميا
بس بجد كان يوم رائع ان شاء الله يتكرر تاني وهواري ولميا ورفعت ييجوا معانا

باحب الورد






























الدنيا برد الدنيا برد وعم خليل بيسقي الورد... سمعتها للمرة الاولى اليوم بصوت احمد منيب عرفت اسمه وسمعته مرات عديده ولكني لم اجرب احساس ان استمع الى صوته ، وقتها ايقنت لماذا اصبح محمد منير متميزا ولكني شعرت بان صوت منير استنساخ لصوت منيب لم احزن من اجل منير ولكني احترمته اكثر فمنيب يستحق هذا النقل بالكربون وان ظل صوت منيب شجيا اكثر من منير بكثير
وعندما وصلت الى اغنية الدنيا برد تذكرت وقتها الورد وهذه الحالة الغريبة التي امر بها فقررت ان ابحث عن الورد وقطفت لكم كم وردة كده يارب يعجبكم الورد، اصلي باحب الورد قوي قوي قوي قوي
مش عارفه ليه بافتكر الملايكة لما اشوف

اللي فيه الخير


قلقانة ومحتارة وزعلانة ومشغولة وخايفة ومرعوبة ومعنديش وقت فراغ خالص ، نفسي انام كثير قو يواتفسح واخرج واروح سينما واشوف بحر وميه وعيال صغيرين بيلعبوا كل دي مشاعر جوايا متلخبطة وحاسه اني باعمل تصرفات غريبة واظبط نفسي وانا باعيط من غير ما اخد بالي تفتكروا فيه ايه ؟؟

يمكن عشان مووضع الجواز...

ولا يمكن عشان موضوع السفر؟

ومحتمل يبقى عشان الشقة والترتيبات؟

ويمكن برضه عشان براء ؟؟

بس هو اللي مش ممكن اني لسه بعقلي

انا حاسه ان فقدت جزء من هدوئي وكمية لا باس بها من دمي اللي اتحرق من عمايل جوزي المحترم

عموما يلا بقى اللي فيه الخير يقدمه ربنا


ملحوظة:

ياريت يابراء بلاش تستغل اي كلمة من اللام الللي انا قلته عشان تيجي تقول لي انت غلطانة واعترفتي في البوست انا عارفه الحركات دي...

الاثنين، مارس ١٩، ٢٠٠٧

نقلنا عفشنا


الصحبة الحلوة


علاء بيصلح النجفة في اوضة المكتب

ندى بيرقص بالكرسي

براء وفؤاد ومعركة باب النيش


أبو رفعت وصورة جوه الكادر بتاع باب النيش التاني
هواري وقاعدة السفرة

دريني وجزء من الدولاب

كان يوم حلو قوي قوي يا جماعة فعلا مكنتش متصورة انه هيكون حلو كده احساس رائع انك تلاقي الناس اللي بتحبهم جنبك بيساعدوك ويقفوا جنبك ويسيبوا حيااتهم مشغلهم عشان خاطرك وكمان لما يكونوا كلهم جنبك في وقت واحد
والاحلى بقى ان اليوم ده ييجي بعد يوم سفر لاسماعيلية مع الناس دول برضه

هاحكي لكم عن اليوم بتاع اسماعيلية التدوينة الجاية

شكرا لكم جميعا هواري وعلاء ودريني ومصاعيبو وندا وفؤاد وحمزة وطبعا رفعت الجميل بكاميرته الرائعة وصورة المطرقعة تعالوا بقى اتفرجوا على الشقة على فليكر
ورفعت كعادته دوما اتحفنا بفيديو جميل عن اليوم الرائع ده اتفرجوا عليه برضه

الثلاثاء، مارس ٠٦، ٢٠٠٧

يا نجف بنور


يا نجف بنور يا سيد العرسان اه يا نجف حلو يا نجف" متفهموش غلط ده مش مطلع اغنية جديدة ولا قررت انافس الاستاذ عبد العزيز محمود دي اول حاجة جت في بالي يوم مغا اشترينا النجف" اصل احنا عقبال عندكم نزلنا درب البرابرة بعد صراع طويل مع زوجي الحبيب انه يفضي نفسه يوم نختار فيه النجف وقد كان بعد اسبوع من المحايلة والمطاردة والاتهام باني ست فاضية وان دماغه مش رايقة المهم نزلنا البرابرة واخترنا النجف .


كان من النوع اللي بيتركب فيه كريستالات كثير يعني نازل بحاجات كده شبه اللي فوق وبراء بصراحة اللي اختاره انا كان نفسي اجيب حاجة فيها شغل نحاس ولمبات بسيطة المهم اخترت نجفة اوضة النوم وجبت نجفة الصالة واوضة المكتب من ام حاجات نازلة مش عارفه اسمها ايه بيقولوا كريستال ( بس هو طبعا مش كريستال ولا حاجة قزاز يعني) المهم خدنا النجف ومشينا وكانت من غير تركيب الحاجات اللي نازله عشان براء كان مستعجل قوي وقلنا نركبها في البيت

وعينكم ما تشوف الا النور روحنا الشقة بعد جولة البحث عن تاكسي في العتبة ينفع يروحنا الهرم بالكوالين والستاير والنجف والبلتكانات فرصة بقى براء موجود.واهو كله بيعدي

...

فضلنا نركب في النجف لحد الساعة 12 بالليل مجهود فظيع بجد والله عيني تعبت قوي وبيرو زهق وقام يتمشى لان عدد القزاز ده مهول بس كان احساس حلو قوي انك تعمل حاجاتك بنفسك
لحد ما خلصنا وبراء صمم يركبهم ساعتها وقبل ما يركب اللي في الصالة نزلت على الارض واتدشدش القزاز بتاع النجفة وربنا ستر وكان فيه بتاع قزاز زيادة نعدل به اللي اتكسر عموما الموضوع عدى لكن براء قال ان النجفة اللي في الصالة لازم نكسرها قبل الجواز بدل ما انا خايفة عليها قوي كده-

هواري..كل سنة وانت حوت


هواري يحمل الفلاح المصري بين يديه

هواري وبراء ومصاعيبو والجائزة التقديرية


مصاعيبو يشير الى جائزة الهواري الذي يحمل الهدايا ومبتسما على غير عادته

ثلاثي اضواء التدوين والهدايا

برءا وهواري والاحتفال بالنصر



عشرينات والتورتة وهواري والفلاح الفصيح
امبارح كان عيد ميلاد هواري...

هو يوم مختلف في شهر مختلف اصل الشهر ده يا جماعة كله مناسبات عيد ميلاد هواري وعيد ميلاد يسر وعيد ميلاد مصاعيبو وعيد خطوبتي وعيد الام..

بس امبارح كان ه طعم مختلف يو احتفالي، في عشرينات احتفلنا وجبنا التورته والفلاح المصري صحيح لم تتم مشاركتي في اختيار التورتة التي لم تعجب هواري ولا اعجبتني انا شخصيا ولا حتى الفلاح الفصيح ولكنه كان يوم مختلف لم ينتهى بالتورته ولا بالصور العشريناتيه بل استمر على قهوة البورصة وبالرغم من اني محضرتش احتفال البورصة بس رحت اخر اليوم اميرة ولميا ودعاء وفؤاد وكلهم كانوا مشيو لكن جوزي ومصاعيبو وهواري استنوني شفت الهدايا وصورتهم الصور اللي شوفتوها ومشينا كلنا بجد كان يوم مختلف

كل سنةوانت طيب يا ابو الهوارة وكل سنة وانت مبسوط وفرحان وميتسم حوت على راي مصعب