الخميس، مارس ٢٢، ٢٠٠٧

اسماعيلية والفول الحراتي

اسماعيلية....انا مكتبتش عنها غصب عني والله ده كان يوم اكثر من رائع انا رجعت وكاني واحدة تانية خالص لدرجة اني حاسه ان اللي فات ده مش اسبوع ده شهر الايام بعد يوم اسماعيلية ده بقى ستين يوم في بعض .
قبلها بيوم كنا في معكركة مسح الشقة وتنظيفها وطبعا دي معركة استمرت حتى منتصف الليل وبراء كالعادة باعني وسابني اغسل الارض واحك في السيراميك وقعد يغني لي " والله يازمن لا بايدينا زرعنا الشوك" ويقلب في الاغاني ع اللابتوب وكل ساعة كده ييجي يدلق دورق ميه المهم تعبت فعلا ومع ذلك صحيت بدري قوي لان الميعاد كان 9 الصبح عند المرج الجديدة وبالفعل صحيت 7 الصبح وبيرو اتصل وقال مش قادر اقنعته ونزلنا رحنا .
ووصلنا 10 المهم وصلنا اسماعيلية وبدات التفاصيل طبعا انا اول ما شفت الفول الحراتي زقططت من الفرحة ورحت اجمع الفول الجميل على فكرة يا جماعةو الاكل من ارض حد مش حرام لو انت جعان ده كلام امي الغالية وبعدها لقيت غيط بصل اخضر معرفتش امسك نفسي رحت قاطعة بصلاية وجبت رغيف عيش من الكيس اللي مع علاء وحطيت عليه كاتشب كان في شنطتي واكلت وكان طعمه هايل
وصلنا البيت والبهوات قعدوا يلبعوا فيفا وعاملين فيها في كاس العالم المهم طبعا بم اننا في مجتمع ذكوري(.....) بلا ش شتيمة عشان اليوم ده كان حلوي هم قعدوا يلعبوا واحنا دخلنا المطبخ وعينكم ما تشو الا النور اختكم اميرة دخلت في صراع مع صواع الكفته ودعاء فقدت الذاكرة
اه انتا نسيت اقول لكم ان اليوم ده كنا معزومين عليه من علاء باشا ودعاء اخته الكميلة اللطيفة دي، نكمل بقى دخلنا المطبخ وكل ما اسال دعاء على مكان حاجة تقول لي مش عارفه اسالي علاء كنت هاموت من الغيظ بس قعدت اضحك اصلي عارفه دودو الجميلة وطبعا الرسالة وصلت وعرفت ان مالهاش في المطبخ خالص بس الحق يتقال البت غلست المواعين كلها طبق طبق
اميرة شغالة يعني بتعرف تعمل حاجات لطيفة واا كنت زهقانة من نفسي قوي عشان باعرف اطبخ كان نفسي ابقى مبعرفش عشان ما ابقاش ام العيال بقى والست اللي عارفه خلصنا تتبيل الفراخ وتصبيع الكفتة وعمايل المكرونة والملوخية وهم لسه بيولوعوا النار كنت عايزة اولع فيهم لان الاكل اتاخر قوي على ما خلص
المهم اكلنا وشبعنا قوي والحمد لله وقعدنا نلعب لبعة الصراحة وانا مبطلتش لعب سوليتير فرصة بقى براء مشغول مع صحابه وقلنا كلام لطيف قوي وبالفعل الاراء كانت مفيدة ورجعنا يوميها كلنا بنحب بعض اكثر وفاهمين بعض اكثر بكثير قوي من قبل كده
ياخبر نسيت اخطر حاجة في اليوم خطبة الجمعة للشيخ الزنديق احمد ندا ...قال ايه اختاروا ندا يخطب وكانت شورة قال اربع كلمات مثلا والباقي سكوت والاربع كلمات ثناء وصلاة على النيبي صلى الله عليه وسلم وانا كنت هاموت من الضحك كنا البنات واقفين وراهم طبعا بس كنت هافطس بجد كانت خطبة هايلة بحيث ان الصلاة والخطبة وكل حاجة استغرقت على الاكثر 10 دقائق منهم 9 دقائق سكوت في الخطبة
بس يا خسارة اليوم كان ناقصة شوية ناس مهمين قوي قوي قوي على راسهم رفعت باشا طبعا بكاميرته الخفية اللي بترصد كل تحركاتنا ، وكان ناقصة هواري ولميا
بس بجد كان يوم رائع ان شاء الله يتكرر تاني وهواري ولميا ورفعت ييجوا معانا

هناك ١٠ تعليقات:

shabfa2re يقول...

جو الرحلات جميل جداً
ربنا يسعدكووووووووووووو

elkamhawi يقول...

زى ما قلت قبل كدة اليوم ده كان جميل عشان انتو كنتوا موجودين فيه

وان شاء الله يتكرر ورفعت باشا يكون معانا

خيرالدين يقول...

أنا بصراحه علقت معايا حكاية مجتمع ذكورى ..حسين انك هتقولى بعدها متعفن
جميل البوست واسلوبك فى حكاية الاحداث جميل

مُصْعَب إِبْرَاهِيم يقول...

كان يوم حلو أوي أوي

نفسي يتكرر تاني

-_- يقول...

انا زهقان من اسماعلية

تبدلي ؟؟

محمد حمدي يقول...

إنتو كلكو على بعض جروب يجنن الصراحه

ربنا ما يحرمكم من بعض

أُكتب بالرصاص يقول...

فعلا
كان ناقص الكاميرا
لان اي موضوع بيتعضد بالصور
انا احترمه قوي

كمان احترم الكاتشب جدا


وايه الخطب النارية دي
تسع دقائق سكون ؟
وعدي يا وعدي


الحمد لله على السلامة

قسما سأنتصر يقول...

مافى جو احلى من هدا الجو

واحد يقول...

لازم تفضحوني يعني ...ربنا يسامحكم

لا تعليق! يقول...

العيب مش في الايام ولا في البلد...العيب في الناس و الضمير اللي اتعدم