الخميس، مايو ١٧، ٢٠٠٧

موزة هربت

موزة لونها أخضر وسكر لونه ابيض في لبني

ياتري عايشة ولا ميته جعانة ولا شبعانة مبسوطة ولا زعلانة ، ياحبيبتي يا موزة..هيء هيء هيء انا مدونتش من زمان كنت مشغووووووووووووووولة قوي قوي قوي مش عارفه حصل حاجات كثير تستحق ادون عنها والله كل يوم ابقى عايزة اكتب بس مقدرش وعشان الناس الخبيثة مش براء السبب بس اهو يعني الدنيا اتغيرت بس انا هاحاول ادون دايما ...


نيجي بقى لموضوعنا موزة الحلوة طبعا انتوا عايزين تعرفوا هي مين، دي عصفورتي الحلوة الجميلة اللي حموزة اخو براء جابها لنا هدية جوازنا هي مكنتش لوحدها طبعا هي وحبيبها سكر .


في يوم نسينا المسمار اللي عند البيت الخشب اللي المفروض انه بتاع البيض في القفص مش مقفول كويس وكنا بايتين بره ورجعنا لقينا الباب مفتوح وموزة مش موجودة وسكر زعلان وواقف مكانه.


زعلت قوي وقلبي اتقبض عشان سكر وعشان موزة قلقانة عليها قوي بس يمكن تبقى كويسه وحبه تعيش في حرية...الكلام ده حصل من يوم الاتنين


السؤال بقى انا ليه قررت اكتب عنها النهارده فيه سببين الاولاني ان براء سالني الصبح تعيشي لوحدك في الدنيا ولا مع حبيبك في قفص فقلت له مع حبيبي مش عارفه انا اخترت صح ولا غلط بس موزة اختارت تعيش لوحدها .


والسبب التاني اني جبت سكر معايا الشغل النهارده عشان ندور على حبيبة تعيش معاه في القفص بعد ما هربت موزة

هناك ١٢ تعليقًا:

kareem azmy يقول...

اشكرك على زيارة مدونتي
و دعوتك ليا لقراءة هذا الموضوع
انا مش عارف انتى تقصدي الموضوع ده و لا موضوع تاني

عموما
حلو موضوع موزة ده
و لو انى مش متاكد هل فعلا موزة و سكر دول فعلا عصافير و لا ده اسقاط لناس حقيقية

اصل مش فاهم هو سكر هيلاقي ازاى عصفورة ف الشغل عندك

عموما سواء كان عصفور او انسان فكلنا بندور ع الحب

اتمنى لك السعادة

كريم

ام مليكة يقول...

كريمممممممم مرسي على كلامك هم عصافير فعلا يا سيدي وصورتهم في الموضوع حقيقة فعلا وبعدين انا قلت هاخده الشغل عشان بعد ما اخلص شغلي اروح اخده ونلف على محلات العصافير ونختار له شريكة جديدة

kareem azmy يقول...

هاى انا قريت الموضوع بتاعك على عشرينيات

هو بداية الموضوع او الشاب المصري اللى قولتلي عليه المفروض هو انا و لا حد تاني اصل تقريبا نفس موضوع و ها قد بدات المواجهة مع تغير كلامي للفصحي

المهم
اشكرك ع الموضوع
و متهيالي لو انتى مكتبتيش اسم مدونتي لاني مصري و كحفاظ على شخصيتى فاشكرك

اه فيه حاجه
دائم الحزن مش شاب قطري ده شاب مصري

تحياتي

اه يا ريت تبعتيلي ايميلك
و مش هنشره التعليقات

Reemo يقول...

هو الواحد يبقى طماع لو عايز يعيش مع حبيبه بس مش فى قفص
يعنى يعيش مع حبيبه بس يبقى حر برده
مش عارفه
بسممكن القفص والحبس يموت الحب؟؟
برده مش عارفه
على العموم اكيد هتلاقى موزه تانيه لسكر
بس هتضطرى تبعدى عنه شويه علشان لازم ياخد فتره تآلف مع موزه الجديده عند بتاع العصافير
تدوينك بسيطه بس خليتنى افكر فى حاجات غريبه
جايز انا اللى ليا مزاج افكر فيها :)))
ربنا يكرمك ويوفقك
تحياتى

radwa osama يقول...

اقولك على اقتراح حلو ..حطيه جوة القفص بتاع الراجل بياع العصافير ولما يبدا يتوالف مع حد اشتريه يمكن تعوضه عن موزه..وحشتينا

غير معرف يقول...

عودا" حميدا" ، سؤال مهم و صعب الاجابة عليه و اختياري هو العيش مع الحبيب ، لأن العيش بدونه حبس في زنزانة أضيق .
"يقال ان سيدنا سليمان عندما هدد الهدهد بالذبح أو بالعذاب الأليم ، أن العذاب الأليم هو احتجازه مع طيور من فصيلة أخرى لا تعرف فضل و قيمة الهدهد "

Organica يقول...

ياخسرتك ياموزة

محمد عبد الغفار يقول...

الكنارى لا تعيش خارج القفص

تموت

ام مليكة يقول...

شكرا يا جماعة على مساندتكم لي في فراق موزتي حبيبتي الحمد لله لقيت له حبيبة حلوووووووة وشبهه قوي زرقة مخططه وهو فرحان بيها قوي وخدته معايا محل العصافير وهو قد يناغش فيها ويبوس فيها بس هي تقلت عليه شوية بس ايه جامدة عايشة دور البنت الخام بقى ومحيراه بس ان شا ءالله هياخدوا على بعض

elkamhawi يقول...

سوال براء حلو قوى؟
وانا مش عارف اجاوب عليه

سندباد يقول...

اولا عود احمد لعالم الدوينات ثانيا انا اعيش مع حبيبي في اي مكان بس المهم انه يكون عايزني وبيحبني

ام مليكة يقول...

برافو يا سندباد اجابة صحيحة زي اجابة دودو بس معلش انا ست متجوزة مين احمد ده؟؟