الاثنين، مايو 21، 2007

تفتكر هاقدر ؟؟

قاعد مأنتخ على كنبته المفضلة في البيت مع اللابتوب طبعا قبل الدش ما ييجي..بس عارف وحشتني

قلبي سافر امبارح لمدة اسبوعين وساب لي عقلي وبس ، عقل من غير قلب وامتحان خطير، وحدة، شغل، خوف، فراق، دنيا، ده احساسي بالظبط دلوقتي ، انا بجد حاسه احساس غريب قوي اني باقاوم نفسي باضغط علي عشان ابقى قوية، امبارح براء كان مسافر وانا كنت مشغولة قوي وعماله ابعد عن نفسي وعن عقلي فكرة الوحدة بس غصب عني فكرت فيه وقعدت اتخيل براء وهو ماشي جنبي كل يوم الصبح نتخانق نركب ميكروباص ولا ميني باص لجمعية ، ونتخانق عشان هو بيحب يفتح التلفزيون وانا باتخنق من تركيزه الكم ساعة اللي قاعدهم في البيت مع صور ناس تانية، واشد في شعري من رميه للهدوم والجزم في كل حتة في البيت،

للحظات ضعفت ولقيت عيني بتدمع غصب عني وانا كنت مقررة اني مش هاعيط وهو مسافر ولازم ابقى قوية لاني هاعيش لوحدي من غيره ومن غير ما يكون جنبي...

النهارده ركبت المترو بعد ميكروباص الجيزة لاول مرة في تاريخ جوازي معلش يابيرو بقى...كان نفسي اعمل كده بصراحة، يارب يرجع بسرعة وانا هاركب الميني باص من غير كلام


. بس تفتكر هاقدراتحمل بعدك؟؟

هناك 8 تعليقات:

REEMOO يقول...

إن شاء الله الأيام تعدى بسرعه يا قمر
ويرجعلك بسرعه
اكيد طبعا البعد صعب وخاصه من حد بتحبيه
بس بجد والله الأيام مفيش اسرع منها
هتلاقى الأسبوعين دول مرو هوا
بس انتى اجمدى شويه كده
وحاولى متفكريش فى سفره علشان الايام متمرش عليكى بطيئه بسبب التفكير ده
ربنا يكرمك ويسعدك يا رب
تحياتى

محمد السيد يقول...

بصي بقي ... من الآخر كده ... يعني بصراحة ... وصراحة أهل إسكندرية مفيش زييها ...

لا حتقدري ولا هو حيقدر ... وحتحاولي تقنعي نفسك إنك قادرة وانك مستحملة وانك عاقلة ومتفهمة .... والكلام ده كله ...

وإن دي دراسته وكليته اللي لازم يخلص منها عشان يبقي معاكي علي طول بعدها ...

وإنك لو بتحبيه يبقي لازم تصبري وتهوني عليه السفر ده كله ...

وكمان ممكن تقولي ده مسافر عشاني انا ... ومبهدل نفسه ومفيش غيري في باله ...

وانك حتسامحيه علي قعدته دي كلها قدام التليفزيون واللاب توب ... و مستعدة تشغليه له بنفسك بس يرجع ...

وانك حتركبي معاه اللي عايزه ... ان شاء الله حتي يحب يروح مشي برضه معاه ...


لكن في الآخر برضه وبعد كل الكلام ده ....

أول ماتقفلي علي نفسك لوحدك ... من غيره ... حتعيطي ...

آه والله ... مهما حاولتي حتعيطي ...

تعرفي ليه ؟

عشان بتحبيه ... ومش متخيلة الدنيا من غيره عاملة إزاي ...

وهو كمان بيحبك ...

وعشان بتحبيه .... عيطي له ...

عيطي له أوي أوي .... وقولي له يرجع ....

Mohamed A. Ghaffar يقول...

صعب صحيح متعب صحيح

بس هتقدرى

ربنا يهنيكم ببعض

bagabigo يقول...

متعيطيش طبعاً و لا تقوليلوا يرجع هو اكيد سافر عشان حاجة مهمة لازم تكونى قوية لو فعلا بتحبيه لازم تثبيتله انك قوية و يقدر يعتمد عليك

بنت امي الغالية يقول...

هيء هيء هيء والله انا عارفه اني لازم استحمل بس انا عيطت امبارح وانا باكلمه من غير ما ياخد باله اصل بيرو ده شخص جميل قوي يملأ الدنيا على اي بني ادم ماحال علي انا وانا ماليش حد غيره
يلا ربنا يهون ادعوا لي قوي

احمد رفعت يقول...

ياه يا دعاء بحب الاحاسيس ديه أوي وبحب المشاعر الجميلة اوي ,اجمل ما في الكون الا نتذكر للناس الا جمالهم وننسى ما فيهم من عيوب .
ربنا يقرب البعيد .
وربنا يباركلك في جوزك الجميل يا دعاء .

تحياتي لكم اوي

radwa osama يقول...

ياااه يا دعاء نفس قعدة عمرو على الكنبه ..بالضبط والله وكانه نفس الاب توب العين ونفس التصرفات ونفس الخناقات ..حاسه بيكى يا قمر انا بحس كده لما بسافر لوحدى وانام بليل لوحدى من غيره ..احساس مر قوى..ربنا يعديه بسرعه ..اصل انت بت جادعة

بنى أدم مع وقف التنفيذ يقول...

يروح و يرجع بالسلامة