الأربعاء، نوفمبر 21، 2007

أنا هنا وهو هناك


انا هنا وهو هناكعندي مفاجاة انا عارفه انكم منتظرين اكتب واقول ان براء وصل مصر والحمد لله وان المور اتعدلت وكله تمام لكن بقى يا جماعة انا مش هاكسفكم هو فعلا بيرو وصل القاهرة صباح الاثنين وبالتحديد في تمام الساعة 6 صباحا لكن انا سافرت العين السختة في مؤتمر تبع الشغل يوم الاثنين برضه الساعة 8 الصبح وبالتالي اصبحت انا هنا في العين السخنة وهو هناك في الهرم

لكن الحمد لله قابلته لاني استنيته في المطار الفجر وقعدنا مع بعض شوية من سبعة مثلا الى 8 وبعدها هو روح وانا سافرت...

براء فرحان قوي بالتجربة وشايف انها شيء هايل في حياتنا لاننا لازم ننطلق وكل واحد فينا يشوف مستقبله، انا طبعا مكنتش عايزة اسافر خالص لانه واحشني بس بصراحة هو اقنعني لانه هو كمان عنده شغل كثيره قوي
هنا بقى قابلت واحدة مكنتش متخيلة اني ممكن اقابلها لانها حامل في الشهر السابع برضه وكمان شكلها اتغير ولو انه مش قوي زيي يعني لكن برضه اختلفت ومعرفتنيش لما شافتني هي يافا جويلي المخرجة الجميلة وكان شيء مختلف ان اتنين حوامل في نفس الشهر يكونوا في مكان واحد وكمان بيعملوا شغل ويحضورا ورش عمل ويطلعوا سلالم...حاجة مبهرة

انا مش متضايقة ولا مبسوطة بس حسه باختلاف فعلا بس هانت خلاص كلها بكرة وارجع له البيت واشوف ليه بقى كان عايز يطرقني

هناك 5 تعليقات:

elkamhawi يقول...

حاسس انك انتى وبراء يمكن تكونوا احسن اتنين متجوزين
المعنى مش واضح قوى صح
المهم انى عايز اقول انكوا حلوين قوى انتو الاتنين
وبحبكوا قوى انتو الاتنين
وربنا يوفقكوا انتو الاتنين

aliaa abdalfatah يقول...

الف حمد الله على سلامة براء
وربنا يوفقكم انتم الانتنين في حياتكم سوا وفي شغلكم
بسم الله ما شاء الله ولا حول ولا قوة إلا بالله عليكم
لما بشوف مدونتك بحس إن الدنيا لسة بخير
ربنا يكرمكم ويوفقكم
وادعيلي انا لسة حديثة في الجواز بعد 3 أيام حخلص شهر العسل إن شاء الله

radwa osama يقول...

جادعة يا دعاء
انا دائما ما اشيد بيكى ..عندى واحدة صاحبتى متجوزة فى نفس يومك وحاملت معاكى برضه لكن هى مخستعه قوى وكسلانه وماجله الحياه كلها لبعد الولاده وبالتالى هتاجل حياتها لبعد ما النونو يكبر وغالبا مش هتعمل حاجه .. مش عايزه احكم بس ده اللى بيحصل فى اغلب الحالات ..علشان كده انا فرحانه بيكى قوى ونفسى ابقى فى نفس نشاطك لما احمل ..ادعى وقولى امين

بدراوى يقول...

لا انا زعلان كده تتقلى على براء حبيبك
، و بعدين الراجل راجع من السفر تعبان ،يعمل و يأكل ايه؟؟!!
____
المهم تكونى سايباله حبة أكل فى التلاجة عشان ميحسش بالوحدة !!

بنت امي الغالية يقول...

علاء باشا نورت التعليقات والله احنا الاتينين بنحبك قوي وانت اخويا الجميل اللي دماغه عالية

علياء الجميلة مبرووووووك يا روحي ونصيحة من اختك سيبي جوزك يعيش حياته واعملي كماشة مفتوحة مش مقفولة قوي ومتخليش الجواز يسرق عمرك

روضي بقى الجامدة قوي ربنا يخليكي يارب انا بصراحة خفت من مرحلة الانسحاب في الحمل يعني حسيت اني لو استسلمت يمكن انسى حياتي وده مش صحيح يعني الحمل بيفيد فعلا ومش بيضر بالعكس بيكون عندك احاسيس تحفزك على الحياة اما بقى موضوع حملك فانتي عارفه رايي نفسي تحملي بقى عشان نعرف نجوز البت
بدراوي افندي بقى انا قلت كان غصب عني وعايزة اقول لك براء على قد ما كان واحشني كان مبسوط اني هاسيبه يشتغل براحته
الاكل بقى ياسيدي عملت له 3 انواع ورجعت لقيتهم تخيل قعدت اطبخ واوضب وفي الاخر كسل يسخن الاكل مين بقى اللي يزعل