الأربعاء، أغسطس ١٦، ٢٠٠٦

غنينا للمقاومة



كنت حاطة أيدي على قلبي قبل الحفلة ما تبدأ وأنا حاسة إن الإضاءة والداتاشو لسه مش متظبطين بس الحمد لله اتمنطت قوي لما لقيت الجمهور كبير فوق ما كنت أتخيل تقريبا القاعة كلها كانت مليانة، بصراحة مكنتش مصدقة نفسي.

قدمت الحفلة ومقلتش ولا كلمة من الورقة لقيتني باتكلم من قلبي فعلا وباحيي المقاومة اللي عرفتنا معنى الانتصار واللي علمتنا أزاي نفرح وبدا عرض الفيديو كليب اللي غناه فرقة الشمال للزجل والنشيد من فلسطين وعملت منه مريم المعتصم بالله فيديو هايل جدا ومع أول صقفة للناس مع الفيديو بدا قلبي يدق أكثر خايفة أي حاجة تحصل مش معمول حسابها تضيع الدنيا.

وبدأت الفقرات و غنى على إسماعيل وقدم نصر الله من عند الله وأنا إرهابي، وبعدها شعر عبد الرحمن يوسف الهايل وعمر مصطفى قدم أغنية"لبنان راجع غناكي" وبعده بدا العرض الشعري الهايل لتميم البرغوثي.

وبعدها طلع علي الفيل بفرقته الجميلة وزاد تفاعل الناس في القاعة وعلا التصفيق لعلي، وكمان كانت مشاركة محمد البرعي جامدة جدا.

مصطفى محمود أضفى لون مختلف على الحفلة بالفرقة والآلات الموسيقية لكنه أضاف بالتأكيد ومشاركة عبد العزيز مخيون وفقرة تامر نور كلها حاجات أعطت الحفل بريق مختلف.

قفلة الحفلة كانت جامدة جدا مع إسلام الأنصاري الشاب الجميل وأغنيته الجميلة طلقة رصاص وأخيرا الجميل علي إسماعيل ونصر الله من عند الله كما كانت البداية.

الحفلة فعلا كانت جامدة موت وأجمل مافيها إننا كلنا شاركنا في الشغل وبكل حماس وطلع الشغل عالي جدا وأولها كليب مريم ودور مروة ومنى الرائع في الدعاية من خلال معرض الصور والتي شيرتات ومعرض الكاريكاتير ومعرض الفن التشكيلي.

فعلا كان يوم جميل وجديد وتجربة تستحق نكررها في اقرب وقت إن شاء الله، الحمد لله عدى اليوم على خير والناس رأيهم حلو قوي فينا.


هناك ٥ تعليقات:

hero يقول...

لو سمحتي لو كنتوا صورتوا الحفلة فيا ريت تحطوها على النت عشان انا نفسي اشوفها

SOLITUDE® يقول...

الحفلة كانت جميلة
بس مصطفى محمود عمل حركة نص كم وكان بيغني مع الكاسيت...مكانش لها لازمة خالص

المهم...ممكن يا دعاء لو تقدري تحطي لينك للكليب اللي اتعرض في اول الحفلة واتعرض تاني في الاخر خالص والناس ماشية
تقريبا اسمه صقر المقاومة

يا ريت تحطي لنا اللينك بتاعه بعد اذنك

غير معرف يقول...

ألف مبروك لنجاح الحفلة يافندم، وبالتوفيق الدائم إن شاء الله :)

صحيح لو في صور للحفلة أو فيديو هنكون سعداء جدا بالحصول عليه..

سامية جاهين يقول...

الحفلة دي طالعة من عيني والله! لولا بروفات عرض الهناجر أكيد كنت ح ابقى معاكم. الحمد لله واضح إنه كان عرض موفق... كل الناس اللي اعرفهم راحوا سواء من اللي شاركوا أو المتفرجين، حكولي كل خير

يا ريت ما تكونش آخر مرة! المقاومة لسه مستمرة .. والمعركة الأكبر -سياسياً- برضه لازم نشجعها

تحياتي وألف مبروك

أنا باضم صوتي لصوت الناس اللي بتسأل عن التسجيل. لو أي حد سجل أو صور يا ريت ما تبخلوش علينا
:)

Abdelrahman M يقول...

انتو ليه بتتكلموا عن الصور يا اخواننا ؟
هي مش حفله كبيره برده واتصورت فيديو والمفروض تترفع عالنت ؟
يعني انا مستني في عشرينات او عند مصعب أو هنا مفيش أي لينكات ..
ياريت كل الحفله تنزل .. هتلاقوها 200 وللا 300 ميجا .. ممكن تقسموها حسب مزاجكم وتعملوا كل مغني او كل واحد في جزء ..
وتعملوا للتقديم جزء كبيييير اوي :D
لكن عموما .. واضح فعلا انها كانت روعه
ومش مشكله يا عم محرز ان مصطفى محمود يغني بلاي باك .. مش كل الناس بتعرف تغني لايف .. لكن طبعا الاساس انه ميضحكش على اللي قاعدين (A)
عموما مستنيين أي لينك أو لينكات الحفله
سلام