الخميس، مارس ٠٦، ٢٠٠٨

نسيت النوم


"انتي خلاص بقيتي ام انسي بقى انك تنامي وتشبعي نوم زي زمان" جملة قالتها امي فلم اصدقها واعتبرتها احدى جمل الكبار التي لانعترف بها نحن صغارهم...

ولكن بعد هذه الفترة غير القصيرة"25 يوم" تعلمت ان اجرب اولا ثم احكم فمنذ قدوم " مليكة " الى بيتنا معززة مكرمة وانا لا استطيع النوم الا وفقا لرغبتها مهما كنت متعبة او احتاج اليه فهي فقط من تستطيع ان تمنحني تلك التاشيره بالدخول الى السرير والنوم وهي ايضا من يقرر متى استيقظ..! كان هذا الموجز واليكم الاخبار بالتفصيل


في الاسبوع الاول اقامت امي في بيتي لتساعدني وتعلمني كيف اعتني بها وبنفسي وكان اكثر الاوقات راحة لانني كنت استيقظ لاجد الطعام " الفراخ البلدي والشوربة والارز والسلطة" قد جاء هو الاخر الى السرير كالنوم تماما وتحمل امي " لالا" كما يناديها مصعب واكل انا براحتي تماما بعدها مباشرة اجد اكواب الحلبة واللبن والعصير تاتي هي الاخرى بالتناوب الى سريري وطبعا الغسيل والتنضيف وكل مهام البيت اليومية تنتجز بكل بساطة ...دون ان اعلم عنها شيء


بعد السبوع سافرت امي لانها ملت من الجلوس في هذه المدينة المغلقة فهي لم تتعود هذه الاجواء المخنوقة كما تصفها، وبقيت انا ومليكة وحدنا تماما لان ابيها لا يعود الى مع الفجر تقريبا، وهنا بدات الحدوتة...


الست لالا لاتفضل النوم ليلا وهي طبيعة حديثي الولادة جميعا فتستيقظ مع منتصف الليل وتكون في حالة مزاجية غريبة فتبكي لفترة طويلة تريد ان احملها وادور بها في الشقة حتى تستريح ومع اول كرسي يقابلني اجلس قليلا تبدا من جديد في البكاء... وهنا ل بعض اسباب للبكاء اجربها جميعا..


اجرب ان اطعمها فتحصل على قسط قليل جدا ثم تواصل البكاء من جديد، لعله المغص فاعطيها دواء للمغص يساعد على النوم ايضا فتاخذه وتزيد في البكاء فهي تكره الدواء بشدة، ربما كانت الحفاضة استبدلها بجديدة بعد ان احضر عدة الشغل" الحفاضة وكريم التسلخات والقطن وماء ساخن وفوطة" ولا فائدة من كل ذلك فهي تريد ان تستمتع بالليل ولكن ليس البنوم وانما بالاستيقاظ...


وهكذا حتى تقترب الساعة من السادسة صباحا وقتها تكون قد تعبت من البكاء وتعبت انا مرات عديدة من حملها الدوران بها وغفلت عيني عدة مرات محاولة النوم الا ان صرخة منها توقظني فورا...


وعلى العكس طبعا تنام طوال النهار، ولا اعرف ماذا افعل لان الخيارات عديدة وكلها مهمة فخلال ساعات نومها تكون هناك الكثير من المهام منها الاكل لان الطبيب اوصاني بالتغذية الجيدة مثل الحمل تماما بل واكثر، الحصول الى 3 لترات من السوائل يوميا مع التنويع، السلطات، العصائر؟؟؟فكيف افعل اي من هذه المهام الى جانب مهام البيت اليومية التي لا تنتهي بالطبع خصوصا مع توقع الزوار في اي وقت...


التجربة علمتني ايضا انه يجب التضحية ببعض الاشياء لصالح الاخرى فيوم اطبخ واغسل مثلا والثاني انام واكل الموجود في البيت او باقي اليوم السابق واليوم التالي اقوم ببعض مهام التنظيف وهكذا...

احضنها وانام ساعات تريدها هي واستجيب لها انا وهكذا صدقت مقولة امي اني بقت ام ومينفعش انام زي زمان


ملحوظة: اكتب هذه التدوينة مضحية باعداد الطعام او السوائل او النوم

هناك ١٢ تعليقًا:

Salma Amer يقول...

دودو ربنا يكون في عونك بجد
فعلا اهلينا تعبوا معنا جدا فبيتكلموا عن واقع شافوة واكيد محدش حيتخيلة غير لما يجربة
انا بدعيلك بجد
انه يقويكي علشان تعدي الشهور الأولى دي
بوسي لي مليكة كتير وخلي بالك من نفسك

غير معرف يقول...

السلام عليكم ورحمه الله
الف الف الف مبروك على البنوته وربنا يجلها سند للك ولابوها ان شاء الله
وعلى راى الناس مبروك ما جالك وتتربى فى عزك انتى وابوها
بس انتى عارفه يا ام مليكه ومن تجربتى الاولى مع رقيه بنتى ومع اننا عدينا والحمد لله مرحله الرضاعه وهى من اصعب المراحل دلوقتى و لان رقيه بنتى وهى دلوقتى عندها 3 سنين الا شهرين بس بجدورتنى الويل فى الاول ولانها مرحله متعبه جدا جدا لان النونو ده لاحول له ولا قوه الا انتى وبجد بقى اللى بيقوللك ده اسبوع حينام بالليل واسبوع حيقلب حاله مش مضبوط خالص لانهم ولحد 6 شهور تقريبا قالبين صحيان بالليل على طول وكمان اما تعرفك اوى بقى وتتعلق برقبتك نهار وليل
والله للك الله انتى وكل الامهات وليه انا كمان لانى حعيد الكرره دى كمان 4 شهور مع وجود روكو هانم
شدى حيللك على التعب اللذيذ ده
واى خدمات واو استشارات احنا فى الخدمه فى حدود خبراتنا المتواضعه
تحياتى للك
ام رقيه

غير معرف يقول...

السلام عليكم يا ام مليكة هانم

اولا الف مبروك و حمدا لله علي سلامتكم و تتربي في عزك انت و ابوها يا رب
ما شاء الله ماشاء الله زي السكر

طبعا كل كلامك عن النوم ده عاااادي و متوقع منهم يعملوا اكتر من كده في السن ده و عليكي ان تستحملي
المهم انا من خبرتي مع الاطفال , انا عندي محمد و عمر ماشاء الله, من خبرتي معاهم هاقولك الاتي

الاطفال في السن ده بيكون عياطهم و قلة نومهم لكذا سبب , تعالي نمسك حاجة حاجة و نتكلم عنها و معلش استحملي رغيي شوية بس ان شاء الله بعد كده هترتاحي

1 - سبب العياط و قلة النوم ممكن يكون برد او حر يعني شوفي الجو حوليكي اخباره ايه لو برد بصي عليها متدفيه كويس ولا مدفية زيادة عن اللزوم ؟؟ ساعات الكلفته و اللبس الكتير بيضايق البيبي و يخليه يعيط و نفس الكلام لو حر خففي طبقات اللبس شوية و هكذا.

2 - تغيير الحفاظة باستمرار عشان جلد البيبي في الشهور الاولي بيكون حساس جدا و لو اتاخرتي شوية ممكن يجيها تسلخات تضايقها و تخليها تعيط

3 - الغازات و مغص الاطفال في السن ده مؤلم جدا و عشان دي حاجة جديدة عليهم مش بيعرفوا يتصرفوا معاه غير بالعياط المتواااصل و دي حلها بسيط عليكي و علي الاعشاب و ادوية المغص اللي بتعتمد اساسا علي الاعشان و بلاش مواد كميائية كتير عشان المناعة نتاعتهم لسه ضعيفة .

غير معرف يقول...

4 - الرضاعة و ده موضوع كبير شوية لما كنت باقول للدكتور اني باعمل لأبني كل الخطوات اللي فاتت و برده بيعيط قالي بترضعيه كل قد ايه؟
انسب فترة مابين الرضعتين هيه 3 ساعات بيكون اللبن اتهضم و معدة البيبي جاهزة للرضعة اللي بعدها لكن من كل ما تعيط ترضعيها ده هيسببلها غازات و الاكل هايفضل في معدتها و يتعبها نظملها معاد الرضعات عشان كمان تتعود ان مافيش اكل غير في معاده و ده هايساعدك كتير في حكاية نوم الليل
لما تعوديها انه في اي وقت هتقوم و ترضع هتلاقيها بتصحالك كل نص ساعة زي ما اولادي كانوا هابلني لكن كل 3 ساعات انسب وقت و هتلاقيها اتعودت و هيه من نفسها مش هتصحي غير في معاد الاكل. و كمان 3 ساعات وقت كافي عشان انت كمان تاخدي راحتك سواء في النوم بالليل او لو وراكي شغل البيت و اللذي منه في النهار

5 - لو عملتي كل ده و لسه برده بينقح عليها عرق غلاسة الاطفال , سبيها تعيط شوية مش هيضر !!!
اه والله ده اللي الدكتور قالهولي
قالي ان الاطفال ساعات بيكون جواهم شحنات طاقة و مش بيعرفوا يعملوا ايه عشان يطلعوها فالعياط بيكون وسيلتهم الوحيدة خلاص اديها الفرصة دي ماتحرميهاش منها يا ستي و خليها تعبر عن نفسها و تطلع مخزون الطاقة ده بس تكوني متاكدة انها راضعة و مغيرة و الجو لا حر و لا برد و كله تمام خليها تعيش بقه
و هما اذكياء برده لما تلاقيكي مش مدلوقه عليها كل ما تعيط تجري عليها تشيليها هيه من نفسها هتسكت بعد شوية و تشوفلها حاجة تاني تعملها و تشغل نفسها بيها .

حاجة تاني مهمة برده لما تكبر ملوكة شوية علي سن 3 شهور كده حاولي تحطيها في اوضة لوحدها او علي الاقل لو معاكو في نفس الاوضة تكون في سرير منفصل عنكم عشان تتعمل النوم لوحدها و تعتمد علي نفسها في النوم
انا عيالي عودتهم يناموا في اوضتهم لوحدهم علي سن 9 شهور

الكلام كتير عن الاطفال و انا الظاهر صدعتكم
لو محتاجة اي سؤال انا في الخدمة

سلام
ام محمد و عمر

غير معرف يقول...

ربنا يخلهالك يجد ويباركلك فيها
بصراحه مش عارف اقول اية ؟
بس بجد الحمد لله ان انا راجل :)

مُصْعَب إِبْرَاهِيم يقول...

اسمعي كلام أمك يا بنت
دي تعبت فيكي تسع شهور وعشر أيام بحالهم
ريحيها شوية

يوم تعيطي ويوم تخليكي هادية علشان تعرف هي كمان تريح :)

ام مليكة يقول...

ههههههههههههه
مصاعيبو ده سكر والله انت هتبقى اب جامد جدا صدقني والحق اتجوز عشان تلحق تربي

ام رقيه بقى انا متشكرة ليكي جدا كلامك مفيد للغاية ويارب تكوني بخير وادعي لها كثير
اما لومي الحلوة فمرسي قوي على تعليقك وطبعا البوسة وصلت

غير معرف يقول...

معلش هو كدة فى الاول و بعد كدة هطلع عينك....ههههه
بهزر ربنا يخليهالك يا رب

يا ريت تزوري مدونتى انت و هيا

تحياتى...ندى

غير معرف يقول...

معلش هو كدة فى الاول و بعد كدة هطلع عينك....ههههه
بهزر ربنا يخليهالك يا رب

يا ريت تزوري مدونتى انت و هيا

تحياتى...ندى

wael يقول...

اقدر مدى التضحيه
بجد ربنا يكرمكها ويخليهالك
اكرر تقديري للتضحيه

غير معرف يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Câmera Digital, I hope you enjoy. The address is http://camera-fotografica-digital.blogspot.com. A hug.

Bongo يقول...

مبروووووووووك مليكة و ربنا يخليهالك و يباركلك فيها
و يجعلها قرة عين ليكي و لباباها في الدنيا و الآخرة ان شاء الله :)

و الله صعبتي عليا جدااا
ربنا يكون في عونك

امال ماما كانت بتعمل ايه لما كنا - انا و يوكي - توأم معاها !!

الأمهات دول بيتعبوا اووووي

و الله ليكوا الجنة

عجبتني مدونتك اوي علي فكرة ,
حسيت ان البوستس متسلسلة تسلسل طبيعي و جميل اووي

ان شاء الله ابقي زائرة دائمة

تحياتي ليكي و طبعا لمليكة :D

ربنا يوفقك