السبت، أبريل ٢١، ٢٠٠٧

Happy birthday


Happy birthday الجملة السابقة هي رسالة وصلتني على موبايلي يوم فرحي الصبح ساعتها استغربت قوي وقلت مين العبيط اللي باعت لي يوم فرحي يقول لي هابي بيرس داي وانا مينفعش اعرف مين لان موبيلي اللي هو موبيل براء في الاصل وبدلناه مش بيجيب الرسائل بالاسماء المهم معرفتش مين ونسيت في الزحمة بتاعة يوم الفرح.


-2
وانا في بيتنا يوم الفرح الصبح استغربت قوي اني عيطت ودموعي كترت وانا باودع اهلي وخصوصا امي واختي مع اني مكنتش عايشة معاهم اصلا وبقالي اكثر من 7 سنسن عايشة بره البيت وبزورهم قليل قوي بس يومها كان يوم مختلف قوي وفضلت اعيط وبراء مستغرب قوي ورفعت ومصعب ازبهلوا وصوروا اللي حصل كالعاده وساعتها براء فضل يضحك في لحد ما ضحكت.


-3
احساس غريب انك تعمل حاجاتك بنفسك طول عمري بيقولوا علي موفرة وست شاطرة لكن في فرحي كان فيه حاجات كثيرة قوي نفسي اعملها بنفسي لكن للاسف معرفتش اعمل غير كم حاجة كده بس طلعوا تحفة الحمد لله اهمهم بودي الفرح للي لبسته تحت الفستان لانه كان عريان شويتين وطرزته وطلع هايل وكمان "الكواف" الله يكرمها يسر هي اللي فهمتني يعني ايه الكواف وهو ببساطة للي ميعرفوش زي حلاتي سابقا هو الباندانا اللي بتبقى تحت الطرحة او قبل الطرحة وطرزته هو كمان الحمد لله طلع كويس بس احساسي كان حلو قوي وانا لابسه حاجاتي عملتها بايدي وعلى فكرة هم موجودين لاي حد محتاجهم اه نسيت اقول لكم ان الطرحة جدة براء هي اللي عملتها لي يعني تحت امركم طرحة وكواف وبودي ابيض.

-4 اول يوم اصحى من النوم باليل الاقي براء جنبي افتكرت تدوينة رضوى اللي عملتها بعد الفرح وكلامها عن الجواز حسيت احساس غريب قوي المرة دي اني خلاص بقيت حد تاني خالص غير دعاء بتاعة زمان يعني مبقتش انام لوحدي ولا اتغطى لوحدي على فكرة يا جماعة براء بيتقلب كثير قوي وكمان بسرعة وقوة غريبة وبيرمي الغطا يعني لازم تسالي قبل الجواز بيرمي الغطا ولا لا يا اما خلاص بقى كل واحد يتغطى لوحده.


5-اول خروجه بعد الفرح كانت يوم السبت تاني يوم يعني خرجنا الساعة 12 بالليل وقررنا ندخل سينما منتصف الليل وللاسف ملقيناش حفلة في كايرو مول ولا في سينما الهرم ونزلنا الدقي لعلنا نلحق سينما التحرير لقينا فيلم كشف حسا ب وكنا شفناه قبل كده فرحنا سوبر ماركت واشترينا طلبات البيت من الدقي وكان برضه احساس مختلف تماما.


6-
-اول زيارة لاخويا لينا بعد الفرح كان مصر انه يقعد معايا انا لوحدي ويسالني عن براء ويعرف احنا مبسوطين ولا لا كانت مشاعري غريبة ومحرجة قوي من اخويا وكمان قريبة منه اكثر ونفس الشيء مع حماتي لكن بابا براء لقيتني مش واخده عليه عكس زمااااااان خالص ومش عارفه ليه لحد دلوقتي.


7-
اول خروجه تنجح لي انا وبراء كانت اول امبارح ورحنا سينما بقى في سينما الهرم وشفنا 300 سبارتي وخلصنا قريب الفجر ورحنا مترو اتسوقنا والخروجة التانية كانت مع فريق عشرينات المبجل مصعب ورفعت ويسر وشيرين وعلي ومريم وهواري وحمزة اتقابلنا في فدركرز واكلت السلطة اللي بحبها وبراء شرب بيبسي ورفعت ومصعب صوروا لدرجة ان الناس اللي في المحل افتكروا رفعت اللهم احفظنا بس لحقنا ومشينا قبل ما الموضوع يكبر واحنا في المحل الدنيا مطرت بصيت لبراء وقلت له يبص ويدعي لان الدنيا بتمطر وفكرته ازاي كل مرة نيجي فيها هنا الدنيا تمطر كثير ومسكنا ايدينا في ايد بعض واتمشينا في المطر لحداول موقف ميكروباصات.


8-
اول ناس يتعزموا عندنا في البيت كان مصعب ورفعت وياحرام مشيوا بسرعة قوي كان يوم السينما ويادوب كلوا فروت سالاد لكن اول عزومة بجد كانت النهارده مكنتش عامله حسابي بس الحمد لله ربنا ستر عملت لحمة وملوخية ورز وكان عندي باقي صينية بطاطس وكان فيه حمامة ونص وباقي مكرونة باشامل ومحشي وعيش وفروت سالاد تاني وكان غريب قوي اني بقيت ست بين بقى مع اني باحب المطبخ قوي بس غريبة المشاعر دي.


9-

نسيت اقول لكم حاجة مهمة قوي اني يوم حنتي كان يوم حلو قوي وغريب قوي في نفس الوقت يومها الجو كان حلو قوي والشمس طالعة وفجاة الدنيا مطرت بس مش مطر عادي ولا طبيعي زي مطر السنين اللي فاتت دي كانت بتمطر ثلج وكان فيه برد ورعد وسيول في البيوت في البلد وكان هو نفس ميعاد الكوافير بتاعي وكل الناس في البلد قالوا اني كنت لاحسه المغرفة يعني طفاسة يعني وده مثل بيتقال على العرايس اللي فرحهم بيبقى يوم مطرة .

وامي زعلت قوي لان الصباحية بتاعتي كانت هتغرق مكنوش مديين خوانه وكانوا حاطينها بره وكما المسرح والكوشة وكل الحاجات اتبلت وانا على العكس كنت فرحانة قوي وحاسه انه خير المهم رحت الكوافير ورجعت وتمام شوية والكهربا قطعت وانا في الكوشة قلت خير وقعدت اكلم براء شويتين والدي جي باظ ساعتها صعب علي الناس اللي لسه قاعدين.


10-

يوم الفرح انا قلت اتكلم عنه اخر حاجة عشان كان يوم غريب قوي انا كنت عروسة مركزة قوي قوي وواخده بالي من كل الناس وعلى رأي رفعت مفيش عروسة تعمل قرنين للمعازيم، فرحت قوي بوجود هنادي وعمرو ورضوى كان وجودهم فارق مايا قوي فعلا وفرحت اكثر بتدوينة رضوى الرائعة واهتمام عمرو المفكر الجامد كما نسميه ان يكتب عن فرحنا وكنت مشفقة على هنوده الحلوة لما عربيتها اتعطلت يوم الفرح وعملت المستحيل عشان تيجي...وفرحت بشيرين وعجم واستاذ على لانه عريس جديد وافتقدت هبه منى وليلى وهواري واستاذ عبدالله، اما فرقة المهام الصعبة دريني وفؤاد وندا وعلاء ودعاء واميرة واميرة هشام فدول طبعا واجب عليهم ييجوا...

بس الفرح كان مختلف تماما عن اللي رسمناه انا وبراء بس عدى على خير الحمد لله لكن اللي عرفته ان الواحد بيتنازل كثير قوي يوم فرحه وبيحاول ان اليوم يعدي وخلاص اه نسيت اقول لكم اهم حاجة يا جماعة المكياج بتاعي يسر الحلوة هي للي عملته لي وامي اول ما شفتني اتخضت عشان المكياج خفيف قوي لكن كل اصحابنا كانوا مبسوطين قوي شوفوا الصور وقولوا لي رايكم في التعليقات.


انا عايزة ادون من زمان قوي والله بس مش عارفه ليه معملتش كده واخر حاجة هاقولها لكم ان اللي بعت الرسالة اللي بتقول عيد ميلاد سعيد كان مصعب عرفت ده وهو جاي مع رفعت وبراء ياخدوني يوم الفرح وكان عنده حق الحياة بعد الجواز مختلفة خالص وكانك اتولدت من جديد.


ملاحظات:

التدوينة مكتوبة من يوم الجمعة بس النت كان فاصل
لمزيد من التفاصيل ممكن تقا تدوينة رضوى ورفعت وعمرو
الجوازمسئولية ومتحسبوش يابنات ان الجواز راحة

هناك ٢٣ تعليقًا:

Eman M يقول...

Mabrook Ya Doaa
Na7no el sabeqon w antom el la7eqon :)

El gawaz gameel ..

Organica يقول...

الف الف مبروك يادودو

متعرفيش انا فرحتلك اد ايه

ربنا يبارك لك يارب

تدوينة جميلة من عروسة جميلة

مبرررررررررروك

والواحد عاوز عزومة لما ننزل مصر
حمام و محشي بليز

:P

محمد عبد الغفار يقول...

ربنا يهنيكوا ويوفقكم

مُصْعَب إِبْرَاهِيم يقول...

هأقول لك تاني وتالت
Happy Birthday!
على فكرة أنا ما كنتش بأهزر .. أنا كنت باتكلم جد أوي :)

في يوم زي ده انتوا أكيد اتولدتوا من جديد

ام مليكة يقول...

مسي يا ايمي عقبالك يارب واورجانيك الحلوة طعا يا حبيبت يمحشي وحمام وملخية وكل اللي نفسك فيه واستاذ محمد جعفر ربنا يكرمك يارب اما بقى مصاعيبو فطبعا عنده حق في اللي قاله كله وانا حاسه كده وعشان كده عملت التدوينة بس يارب نتربى كويس المرة دي

Angel يقول...

مبرووووووووووووووووووووك
كلللللللللللللللللللوش ^^

وعقبال العايزين ^^

غير معرف يقول...

ألف مبرووووك
أنا ما أعرفكمش بس ممكن تقولي فيه كذا وجه شبه أولاً إننا نفس الجيل (راجعي تدوينة رضوى) ثانياً إني تخين زي براء و باشيل الغطا من على مراتي برضه،و بجد مبسوط قوي إن اللي متجوزين في جيلنا بيزيدوا بقينا 4أسر حسب تعداد رضوى
بجد ألف ألف مبروك

اميرة هشام يقول...

الف الف الف مبروووووك ياجميلة

وطبعا كان لازم نيجي ونشارككوا فرحتكوا

بجد كان يوم حلو اوي


الف مبروك يادعاء
الف مبروك يابراء

الحلم العربي يقول...

ألف مبروووك يا عروسة . و ربنا يوفقكوا يا رب
كنتى أمورة في الفرح و الصور جميلة بجد و أحلى حاجة فيها روحكوا الحلوة اللى كانت طالعة في الصور.
انتى على فكرة ماشاء الله عروسة شطورة خالص ربنا يحميكي من عين الحاسدين يا رب.

عمرو عزت يقول...

علي كل حال
happy birthday
ليكي و لبراء
:)

بس فين الصور ؟

radwa osama يقول...

فعلا يا دعاء ميلاد جديد ليكو انتو الاتنين ..الجواز ده حاجه جميله قوى

Mai Kamel يقول...

مبروك يا قمر من اول ماشفت الصورة اصلا وكنت عايزة اقولك اللى عملك الميكب حد بيفهم
بس بما انك قلتي يسر فكدة الموضوع مش محتاج كلام
:D

مبروك مرة تانية وتالتة وعاشرة.. ربنا يباركلكو ويكرمكو في حياتكو يارب

بقالك كتير بحس في كلامك بشجن.. انا متابعة البلوج بس مش دايما بعلق.. ربنا يكرمك يا توتة

Dananeer يقول...

مبروك يا دعاء
زى القمر بجد
و تدويناتكم عن الفرح حلوه
انا كده حضرت

Nouran يقول...

طب اهم حاجة الفرح كان حلو
مبرووووووووووووك جدا ليكي انت وبراء وعقبال مليون سنة بمناسبه العيد ميلاد ههههههه مبروك مرة تانية

AbdElRaHmaN Ayyash يقول...

ألف مبروك يا دعاء :)
ربنا يهنيكم ببعض ويخلليك لبعض دايما
-------
وقعي بيان المدونين للتضامن مع عبدالمنعم محمود
شارك بتوقيعك
أنشر البيان في كل مدونة تعرفها
ساهم في حرية المدونين .. وحرية منعم
http://free4monem.blogspot.com/

nourita يقول...

Mabrouk

nourita يقول...

by the way the video clip is simply marvellous :)
(can i put the link on my blog?)
rgrds
Noura

Aml Ghonaim يقول...

ألف مبروووك يادعاء
بارك الله لكما ؛ وبارك عليكما ؛ وجمع بينكما فى خير ؛؛؛
بجد كنت عروسة زى القمر ؛ ربنا يسعدك ؛
وأحلى حاجة انك عملتى حاجاتك بنفسك ....
الف مبروووووووك

قضية عم أحمد Ahmed Case يقول...

دعاء الكروان
بجد الف مبروك يا اجدع عروسين انتى وبراء على فكرة انا مع مصعب تماماً ان يوم ما الاقى نصفى الاخر هو يوم ميلادي من جديد لاني ابدأ حياة جميلة جديده معاه .
دعاء انصحك انك تخلقى السعادة في كل وقت وانت من جوزك حاولي تدوري في حياتك عن السعادة هتكون فين واعمليها واقولك على سر خطير اسعد القلوب التي تنبض ليحياالناس.

ربنا يسعدك انتى وبراء جدا جدا

اضخكي اوي انتى عروسة

ام مليكة يقول...

مرسي يا احمد انت كان دورك هايل والله وشكرا ع النصيحة واقول لك على سر انا بدات اتعلم منك حاجات كثير بس يارب اعرف انفذها ادعي لي كثير انا وبراء

دعاء عادل يقول...

الف مبروك يا جميله بجد كان يوم حلو مووووووووت وانتى بجد كنتى زى القمر والطرحه كانت تجنن والبادى وكل حاجه عملاهه بجد تحفه
عارفه كل التفاصيل دى حلوه اوووووووى
وربنا يوفقكوا يارب

safa7_karmooz يقول...

انا بشبه على براء...شفته فيين...ممممممممممم

تقريبا كان فى احد النماذج بتاعت ال auc ...عاتى عاتى

ربنا يخليكوا لبعض ...

الواحد بيفرح لما يشوف اتنين فرحانين ومبسوطين كده...:)

هيجى عليكى يوم....ترجعى بذاكرتك لورا...وتفتكرى البوست ده...

anyway

مبروووووووووووووووووووك ولو انها جت مأخرة جدا ...:)

kareem azmy يقول...

هاى دعاء

معلش هي متاخرة شوية بس ياله بقا
الف مبروك ليكي و لبراء
و مش هقولك هابي بيرث داي
ههههههههه

حلو قوي وصفك للفرح و كل شىء و فعلا غريبة قوي انك فاكرة كل التفاصيل دي

ربنا يسعدك انتى و براء

كريم