الاثنين، أبريل ٢٣، ٢٠٠٧

عدنا


أقولها على طريقة القنوات الفضائية العربية "عدنا" الى كل ماكان ولكن المرة دي مع بعض نخرج الصبح ونرجع بالليل طبعا مش دايما ده اول يوم بس لكن النهارده مثلا هايخرج مع صحابه ويسيبني اروح لوحدي


اول يوم في الشغل كان بعد اسبوع واحد من الجواز طبعا الناس مش مصدقة نفسها ومزبهلين خصوصا بعد ما براء دخل ع النت يوم الفرح بالليل وبعد اسبوع نرجع الشغل، وطبعا اكيد قالوا علينا كلام عبي واتهمونا اتهامات تمس قدراتنا الانسانية لكن احنا حبينا نرجع الشغل وانا مش زعلانة خالص وحشتنا الحياة بكل ما فيها من تعب ومعاناة وشغل وناس وحركة وكمان براء كان عنده حاجة مهمة لازم يخلصها


اول يوم بقى كان مختلف خالص كاني في المدرسة ورايحة اول يوم باحلم من باليل ومحضرة الهدوم والجزمة الجديدة لكن اصعب ما في الموضوع هو اوزاي اصحى الصبح بدري عشان اروح الشغل خصوصا اني ساكنه في اخر شارع الهرم ومفيش مواصلة مباشرة للدقي عند شغلي وكمان مفيش فلوس للتاكسي كل يوم فلازم نصحى 7 الصبح وننزل على وريع مثلا نوصل 10 يعني بعد ميعادي بساعة وطبعا عداد الخصم شغااااااااااااااال


النهارده برضه حاولت اصحى الصبح مقدرتش خالص وقلت لبراء انزل انت انا هنام مش قادرة وهو طبعا زعل شوية وفضل مكسل وحتى لو مش هاروح لازم اقوم احضر سندوتشاته وهدومه وحاجاته وافضل صاحية لحد ما ينزل وطبعا فقت ومهنش علي ينزل لوحده فنزلت معاه وعندي نفس الاحساس العيال والمدرسة ومصعب سالني ع الماسنجر عامله ايه في تاني يوم شغل فقلت له زي العيال الصغيرين وتاني يوم في المدرسة

هناك ٢٠ تعليقًا:

shabfa2re يقول...

الله يسعدكو يارب :)

elkamhawi يقول...

ربنا يباركلكم واسف

الحلم العربي يقول...

ياااه ليه كده مشكنتوا تتمتعوابالفترة دي زيادة شوية ...ياللا معلش على العموم ربنا يجعل أيامكوا كلها شهور عسل...

Ahmed Mohamed El. Sayed يقول...

والله يابنت مصــر دة من أحد الأسباب الى مخليانى مش عاوز أتجوز أصلا.... طبعا دة لجانب إن مافيش شقة ولا فى فلوس .. بس أهــــم شـــىء هو إن ربنا يسعدكم بس خلاص ,,,, و النبى إبقى عبرينى و بصى على ال blog بتاعتى ... ينوبك صواااااااب سلام

safa7_karmooz يقول...

ربنا يباركلكم ان شاء الله

بعدين هى فترة وهتتعودوا

يعنى انا بشوف والدتى بتنزل الصبح الساعه 8...المفروض انها تكون هناك 9 الا ربع 9 بالكتير...ورغم اننا قريبين من شغلها فى المحافظة...يادوب 10 محطات ممكمن...بس توصل متاخر كالعادة

فيه ساعات ميكروباصات بتيجى من ميدان الرماية الصبح...وتقولجامعه ...ساعات فى نص الخط عند الطالبية تكمل دقى

عاتى عاتى
ربنا معاكم فى رحلة الشقاء اليومية

ومعانا احنا كمان..:)

Reemo يقول...

الف مبروك يا قمر
ربنا يسعدكو ويوفقكو يا رب
وشويه شويه كده هتتعودى على حياتك الجديده
ربنا يكرمك يا رب
تحياتى

محمد عبد الغفار يقول...

اعملا اللى يسعدكم ويريحكم وملكوش دعوه بحد

ربنا يكرمكم ويسعدكم ويوفق بين قلوبكم

radwa osama يقول...

يا مجانيين نزلتوا الشغل .. عارفه كل ما اقرر ما اعملش ساندويتشات الصبح ده يصعب على قوى ..لدرجة انى احيانا بعملها وانا نايمه ..اصل مواعيدى فى الشغل متاخرهوكتير ببقى نايمه وقت صحيانه ..بس احساس جميل صح ؟.....

ام مليكة يقول...

ربنا يخليكم يارب هونتوا علي شوية بس هنعمل ايه انا قلت لبراء من تاني يوم عايزين عربية فبص لي كده وقال طبعا وبعدين روحنا لقينا الجو حر شوية فقلت له عايزين تكييف فقال لي ده بعد الرعبية ولا قبلهاههههههههه
طبعا يا رضوى احساس حلو قوي بس في تفس الوقت احساس صعب قوي انك لازم تصحي الصبح حتى لو معندكيش شغل تصحي بس عشان تعملي السندوتشات
على فكرة يا جماعة انا منزلتش الشغل النهارده بصراحة كسلت قووووووووووووووووي

دعاء عادل يقول...

بجد احساس حلو اوى وربنا يسعدكوا
عارفه يا دودو انا لسه مش مصدقه انكم اتجوزتو بجد وكده حاسه فعلا انكوا بتلعبوا لعبه وكلنا شاركنا فيها فرح وحورات وكده
بس تصدقى لعبه لطيفه اوى يلى روحى كملى لعبك يا بنتى وجهزى لبسك عشان المدرسه الصبح وبلاش كسل
ربنا يسعدكوا يارب

hesterua يقول...

ع البركة
بالتوفيق انشاء الله

قضية عم أحمد Ahmed Case يقول...

دعاء
انا مش داخل اعلق على البوست ده انا داخل اشهد الناس انك طباخة ماهرة شكراً على عزومة الغداء وعلى المكرونة بالباشمل العبقؤية اللي انت عملتيها .

ام مليكة يقول...

مرسي يا رفعت والله دي اقل حاجة عندنا، لسه فيه عزومات كثير وفيه بط من عند امي حبيبتي وارانب وملوخيه وحاجات مصرية قوي واللهموضوع الباشامل ده طلع حلو علشان انتوا حظكم كويس دي كانت اول مرة اعملها في حياتي عموما تعالى انت بس ومتشلش هم الاكل خليها على ربنا

قسما سأنتصر يقول...

احلى حاجه فى المدونه الرائعه دى
ان براء شبهى

MoHaMeD HoSSaM يقول...

ربنا يخليكوا لبعض يا رب

BackBone يقول...

هوه تعليق ملوش علاقه بالبوست لاكن بأسم انس اللي عايزه تسمي ابنك بيه:

علي فكره انا كمان بحب الاسم ده جدااااااا بس اكتشفت ان فيه مشكله وحيده بس جامده قوي

حولي تقري الاسم ده كده بصوت عالي و خالي واحد يسمعه و يترجمه بالانجليش


أنس = an ass

سوري بقه بس كان لازم اصدمك

rana 3amra يقول...

يا قمر مبروك وعقبال ماتحطى صورة ابنكو اللى هايبقى زى السكر اكيد طالع ليكو امال يعنى لمين
يا رب كل ايامكو تبقى حلوة كدة يا رب

elkamhawi يقول...

مفيش جديد ولا اية

غير معرف يقول...

مبروك يا دودو وعقبال يارب ما نشوف اول بيبي جميل ليكوا باذن الله

وشوشني يقول...

مبروك



بعد غياب طويل عن المدونه هنا