عيد ميلادي فااااااااااات

من كم يوم كان عيد ميلادي وبالتحديد من 12 يوم هتقولوا وليه يعني فاكره تكتبي النهارده؟

هاقول لكم بقى ليه؟

بس الاول هاحكي لكم عن عيد ميلادي شوية اصلي كنت فاكره انه يوم مهم قوي في حياتي كل سنة باستناه وباقعد افكر في شكله ويومه وترتيباته ومين اول بني ادم هيفتكرني برسالة ومين الشخص اللي هيفضل فاكر يوم ميلادي ويعبرني بهدية وينتهي المووضع يوميها باليلل

السنة دي اليوم كان مختلف قوي وغريب قوي غير ما كنت عايزة ولا حاسه خالص كان يوم وحش قوي لدرجة اني قررت انها اخر مرة هافكر في يوم عيد ميلادي ده خالص للابد

السنة دي محدش افتكرني غير اهلي ويسر وشيرين بس والساعة دقت 12 من غير ما رسالة واحدة توصل على موبايلي بالعكس كنت باتخانق مع براء في الشارع واول رسالة وصلت من يسر الساعة 2 تقريبا وشيرين كلمتني تاني يوم لاني كنت اجازة من الشغل واهلي طبعا كانوا اول ناس افتكروني اختي اتصلت بي قبلها بيوم واخويا وماما كمان عموما انا زعلت قوي من اللي حصل وقررت مكتبش لكن كنت مقررة اني اكتب عنه بس اخر الشهر وبم ان الشهر اخره بكره فقلت اكتب يلا اخر سنة وانا طيبة

دمك تقيل

دمك تقيل وكلامك قليل وفي حبك بخيل ودايما مكشر بصراحة دمك تقيل
ده مش كلامي ده كلام فيروز كراوية بس برضه دمك تقيل

عايزة أصاحب

محتاجة قوي حضن واحدة صاحبتي احط راسي على كتفها وافضل اعيط لحد ما عيني تحمر ووشي يتغير لونه وأنهج وأبقى مش قادرة أصلب طولي

وأصاحب واحدة تانية أحس معاها ان عندي قرين ممكن يختار نفس اختياراتي ويقوم بدوري وانا مش موجودة حد أثق فيه واحكي معاه على راحتي قوي اوق لكل اللي نفسي فيه من غير ما اشيل من كلامي ولا اخبي اي حاجة

وواحدة تالتة أحكي لها واشتكي لها وأقول لها اني محتاجاها قوي بس عايزة واحدة تكون عندها قدرة تستوعبني ، تحسني ، تتحمل عقدي ومشاكلي الشخصية ، أنا ساعات باحسد براء ومصعب باحس في علاقتهم بحب وود وقدرة متناهية على الاستيعاب والغفران مهما كانت الظروف ومهما كان الموقف يابختهم ويارب يخليهم لبعض دايما طول العمر

انا معنديش مواصفات معينة في صحابي بس عايزة اصاحب قوي قوي قوي قوي قو ي

فين الخير

أنا ماليش نفس اكتب اي حاجة من كم يوم وأنا نفسي ادون بس مش عارفه مالي حاسه ان الكلام خانقني وان الكتابة مش هتنصفني...

مش هاعرف اعبر عن احساسي نفسي اكتب عن مشاعري مع براء في مرحلة الاعداد للجواز ونفسي ارد على تاجات مصعب واتكلم مع الناس عني وعن خفاياي القليلة ونفسي اكتب موضوع عن غباء التقاليد واعترف اني مش قادرة اتحرر من قيود المجتمع الغريبة اللي عاايشه فيها...

وعايزة احكي عن شعوري بالضياع مش عارفه ليه ولا ازاي بس انا تعبت قوي ومش لاقيه حد خالص يقف جنبي اكتشفت ان الناس مصالح بدرجة كبيرة وحتى مووضع اعمل الخير وارميه البحر ده مش صحيح لاني عملت خير كثير ومش لاقياه وانا في امس الحاجة اليه ولا يمكن العيب في وعملت الخير بس رميته في حتة تانية غير البحر عموما انا متضايقة وخلاص

مصاعيبو عمل الزائدة

مصعب تعبان وهيعمل الزائدة دلوقتي تعالي حالا....قالها براء وانا مش مصدقة نفسي ورديت عليه ...مصعب ....ازاي....فين....ليه....براء انا مش فاهمة اي حاجة...!

مش مهم تفهمي تعالي حالا وبعدين افهمي

ساعتها كنت في الشارع رايحة الشقة عشان نجيب الالوان لنقاش وغيرت اتجاهي من فيصل للهرم وقابلت براء وكان لونه مخطوف قوي وقلقان بشكل غريب المهم رحنا البيت عند مصعب واخدوه وراحوا المستشفى في مدينة نصر كانت الساعة وقتها 1بعد نص الليل بعدها بساعة براء كلمني وكان بيعيط وقال لي مصعب دخل اوضة العمليات من 3 دقايق انا خايف عليه قوي.." ساعتها حسيت قد ايه بيحبوا بعض وفضلت ادعي له لحد ما خرج بعد نص ساعة تقريبا

الحمد لله خرج على خير ورحنا زرناه في المستشفى وكان كعادته متماسك جدا ومبتسم للناس كلها ومتهم بكل بني ادم بيزوره

مصاعيبو الطيب ربنا يقومك بالسلامة ويرجعك لنا على خير ويارب يارب يارب اخلف ولد امور وطيب زيك كده

سافر...ومتطولش غيابك

سافر

اهدوا علي شوية واتطنوا خالص مش براء اللي سافر المرة دي هارحمكم من الكلام على براء اللي سافر أحمد ندا الله يمسيه بالخير ويبغدد خطاه وميحرمناش منه ولا من تعليقاته الفتيه على أعمالنا الفقيرة

ندا" سافر السعودية لوالده مش ارفعه في اول معرفتي به مكنتش باستلطفه قوي بس اكتشفت فيه بني ادم تاني خالص رقيق وبسيط وخواف كمان بيقول انه بيقلق مني قوي وانا متنرفزة من يوم سندوتش البطاطس

آخر يوم قعد هو وبراء ومصاعيبو ودريني وهواري وفؤاد انا تطفلت عليهم شوية وبعدها طلعت ع الازهر عشان اشوف الفرش بس بجد ندا افتقدناك ربنا يرجعه بالسلامة

النهارده عيد حبنا

كل سنة وانت طيبة.... امبارح كان عيد حبنا انتي نسيتي ولا ايه؟" قالها براء اول ما فاق من النوم اللي بيحبه اكثر مني على ما اعتقد كانت الساعة واحدة ونص بعد الظهر

طبعا انا منستش اليوم ولا انه عيد حبنا ولا حاجة لكن انا افتكرت امبارح ومرضتش احرج براء واحسسه انه نسي يوم مهم زي كده" الله اعلم " وفضلت اسكت وخلاص مشكده وبس لكن كمان عيد حبنا النهارده مش امبارح لان امبارح كان اول يوم نروح مكان مع بعض بعيدا عن الشغل

فاكر يوم حبنا يابيرو؟

الغريبة ان يوم حبنا مرتبط بشكل او باخر بمعرض الكتاب يومها براء باشا اتاخر على الصبح وكنت انا مستنية في عبد المنعم رياض وكان نايم برضه زي كل يوم يعني وقعدت انا ع الرصيف لاني مرحتش المعرض قبل كده ابدا ووصل اخيرا وركبا المين باص ورحنا المعرض

يومها اكتشفت ان براء ده شخص تاني خالص مختلف عن الكائن الغريب اللي احنا نعرفه في الشغل ، في المكتب تلاقي براء دايما يتكلم بسرعة وينقد الناس ويطلع في شغلهم القطط الفاطسه في الحقيقة براء انسان طيب قوي وبيتكسف جدا من الناس وخجول الى اقصى درجة وحنين قوي

يومها مكنتش اتخيل ابدا ان موضوع معرض الكتاب ده مترتب وانه محدد هدفه من بدري وعارف انه عايز يخلي والده اللي عنده مكان للعرض في معرض الكتاب يشوفني وتخلص الليلة من غير ما اعرف اي حاجة عن الموضوع

المهم من غير ما اطول عليكم حبينا بعض بسرعة البرق معرفش ازاي ومعرفش ايه اللي حصل بس المهم ان النهارده عيد حبنا