الثلاثاء، أبريل ٠٨، ٢٠٠٨

ضحكت...!


ابتسامة عريضة وحركات من عضلات وجهها الصغير البريء الذي طالما انتظرت ان يضحك منذ يوم الولادة لاتاكد انها تشعر بي وتفهم ما اريده منها وبالفعل ضحكت...

ابتسمت لوجهي مع اول حركة لي على انفها الدقيق وظلت مبتسمة حتى توقفت انا عن مداعبتها فكررت فضحكت من جديد هي اذن تقصدني تفهمني وتشعر بما اريده منها..ياااااااااااه اخيرا

لا اخفي عليكم طيلة هذه المدة قبل ان ارى ضحكتها الاولى لم اشعر انها مثلنا من لحم ودم ومشاعر فقط كنت اتعامل معها مثل الملاك كما تردد امي دوما ان الاطفال الصغار ملائكة يعيشون بيننا ...

اما الان فهي ابنتي التي كانت بداخلي اصبحت فتاة جميلة تضحك فابتسم لها بدوري ردا على براءتها وجمال ضحكتها، وبالرغم من ندرة هذه الاوقات التي تضحك فيها وزيادة نوبات البكاء بعشرات المرات عن ضحكتها الا انها ترضيني تماما وان كان بكاؤها يزعجني ويؤرقني فضحكة واحدة بعد يوم من البكاء يجعلني اضحك بدوري فانسى البكاء

هناك ٦ تعليقات:

حنة يقول...

ياه يا دودو ، عقبال ما تشوفيها عروسة في الكوشة
وعقبال ما تسمعي منها اول كلمة ماما لأنها بتبقى حلوة قوي
ولما بتشوفيها بتمشي اول خطوة
حاجات كتير حلوة قوي مستنياكي
ان شاء الله

مُصْعَب إِبْرَاهِيم يقول...

يا خلاثي يا لالا..
ربنا يخليها يا رب ويحميها وتكبر كده وتبقى عروسة..

عريسك يا بنت هييجي يخطبك مني، سيبك من أبوكي :D

غير معرف يقول...

سبحان الله الاطفال دول احلى حاجه فى الحياه ربنا ما يحرمش حد منهم
بتفكرنى يا ام مليكه اما رقيه بنتى اتولدت كنت بقعد قدمها بالساعات حتى وهى نايمه ابصلها وامسك ايدها وابوسها
احساس اكتر كم رائع
احساس بتحسى بيه انتى بس وبيملك كل حاجه فيكى
وتقولى فى عقللك انها مش محتاجه فى الدنيا غيرك انتى بس وحبك انتى بس
ولحد دلوقتى كل اما اشوفها بتكبر يوم عن يوم قدامى ابقى اقول يا خبر دى زرعتى وفرحتى
ربنا يخليهلك وتفرحى بها فى كل مرحله ويوم ولحظه وهمسه
واوعى تضيعى ولا لحظه من غير احساسك بدفائك وحنانك عليها .......... يارب

الـفجـريـــة يقول...

ربنا يباركلك فيها يا دعاء
وتضحك دايما

هوه دايما ماما كانت بتقولى ان رغم انى الطفل لسه بيكون عنده شهور الا انه مجرد بيبدأ يتاثر بحركات الأم واللى حواليه ويضحك ويركز يبقى كده بدأ الحوار بينه وبيننا حتى لو مكانش فاهم الكلام لكن بيحس بنبرات الاصوات ومعناها..ده فرح وده غضب..ويتأثر بيها

عقبال متدخل المدرسة بأه
:)

ام مليكة يقول...

بجد انتوا فرحتوني قوي بكلامكم ده
حنونة الحلوة طبعا ميرسي خالص وربنا يسعد اولادك السكر حموزة النجم ونور الامور وسارة الجميلة

مصاعيبو بقى طبعا يا عمو مصعب براحتك خالص بس انت ابقي فضي نفسك للعريس
وام رقية بقى والله العظيم كلامك بجد رائع اصلي باعمل كده بالظبط وخفت اكتب كده الناس تضحك علي بس انا بافضل ابص لها واقول يااااااااااااااه هي دي بتاعتي انا وكانت صغيرة وكبرت شوية واتاملها طول نومها ولما افرح قوي اخدها في حضني واضمها جاااااااااااااامد شكرا يا حبيبتي وربنا يخلي رقية السكرة وتشوفيها عروسة جميلة

فجرية بقىمامتك عندها حق في كل حرف قالته فعلا الام لها مشاعر خاصة واحاسيس مختلفة ومليكة حصل معايا كده بالظبط كم يوم وهابقى احكي لكم عنها في تدوينة مستقلة

Salma Amer يقول...

اولا بسم الله ما شاء الله بجد
قمر منور ملاك صغنن شكلها حتطلع بتحب الفرفشة