ولد وميني باص وسواق

طفل صغير لا يزيد عمره عن 9 اعوام ملامحه دقيقه تشبه جسمه الصغير الذي يعطيه حرية في التنقل وخصوصا مع ضيق المسافة بين كراسي الميني باص الذي يعمل تباع فيه، للوهة الاولة اعجبتني الطريقة التي ينادي بها"جيزة- جامعة" مع حركة تلقائية من يده تدل على المنطقة التي يقصدها وفقا للنظام المعمول به في الهرم خصوصا وفي مصر عموما فقررت ان اركب هذا الميني باص لاتعرف اكثر عبلى التباع الصغير

ركبت وكان ملفت للنظر جدا لدرجة ان كل الركا ب اهتموا به وكانوا بيهزروا معاه وفرحانين به جداوهو مصر ينادي على الركاب بالرغم ان السواق مش ماشي على اليمين وكمان ماشي بسرعة وكلهم بيضحكوا لان صوته رفيع قوي وعنده لدغة جميلة في "اللام و الراء" وهو ولا هوهنا عايش حياته وبينادي ولازم قبل ما اي واحد يطلع ياكد عليه جيزة بنص جنيه وجامعة بخمسة وسبيعن قرش مع انها معلومة معروفة قوي بس الرجل لازم يحذر

الحاجة الغريبة قوي ان السواق كان لطيف جدا واكتفى بالركاب اللي ركبوا بداية من المريوطية مثلا ودي حاجة مش ممكن تحصل في الهرم خصوصا في الميني باص ومش بس كده ده مشي بسرعة جدا على شمال الطريق اول ما الكراسي اتملت يعني مفيش ولا مواطن واقف يانهار ابيض ده المفروض ياخد جائزة السواق المثالي

والعلاقة بين السواق والتباع ليها طابع خاص ومن الواضح انه ابنه او ابن اخوه لان فيه شبه كبير في الملامح وكمان فيه نوع من الاحترام الشديد في التعامل

طول الطريق وانا مانعه نفسي من اني امسكه من دراعه واقرره واعرف هو ابن السواق ولا ايه؟ وكمان هو ليه مش في المدرسة؟ لكن قلت بلاش رخامة وكفاية انه وفر لك ابتسامة حلوة على الصبح بدل الصوت العالي والكاسيت الغريب والزحمة اللي بتكون في كل ميني باص تركبيه طبعا هذا الى جانب قلى ادب التباع في الغالب وكمان السواق