دموع العيد

العيد فرحة، جملة ترددها صفاء أبو السعود ونصدقها جميعا فنرددها حتى دون أن نشعر بها لأنه العيد ويجب أن يكون فرحة والسلام

ليلة العيد اللي فات ده على طول، كانت أول مرة مكونش في بيتنا بيت أمي وأخواتي، وكنت في بيت حمايا العزيز وفجأة قعدت اعيط كثيرررررررررررررر وبراء مبقاش مصدق نفسه قاعد جنبي ومش فاهم انا باعيط ليه وعمال يسألني بتعيطي ليه بس..

الغريبة إني أنا كمان مكنتش فاهمة أنا ليه باعيط بس كنت حاسه بحرقة في قلبي وفضلت على كده نص ساعة مثلا ومقدرتش أنام بسهولة خالص...

وتاني يوم الصبح مصحيتش طبعا لأني منمتش أصلا غير بعد الفجر وكانت اوضتنا مقفولة علينا في بيت العيلة، وقعدت افتكر بيتنا في البلد واني كنت برضه مبصحاش غير بصعوبة وفي الغالب عمي وخالي واخويا كانوا يروحوا يصلوا العيد وبعدها ييجوا يسلموا علي وأنا لسه في السرير ..

صحيت وسلمت على حمايا وحماتي والبنات، كان يوم عيد بس غريب قوي ومستوعبتش معناه غير لما سافرت البلد وحضنت أمي وأخواتي وشفت عيال خالي الصغيرين اللي لبسوا لي لبس العيد تاني في ثالث يوم مش أول يوم