بحبك ....يا نونا وهتوحشيني

بطبوطة وحلوة وكتكوته

بطبوطة..امورة...طيبة...رزينة...ذكية...حنينة قوييييييييييييييييييييييييي، اسمها هنادي...
بحبها بشكل باحس انها اختي اللي جت لي على كبر، ملامحها كميلة قوي ووجودها في حياتي فرق جدا صحيح عرفنا بعض في ظروف غريبة شويتين لكن فعلا كانت مؤثرة قوي بالرغم من انها منذ فترة قصيرة وانا معاها باحس اني مستريحة قوي ، فرحانة قوي ، ومتطمنة قوي...

بصوا ياجماعة انا بحبها بشكل عجيب شوية انا بطبيعتي اجتماعية وباحب الناس لكن نونا الشعنونة التواصل معاها مختلف شكل تاني وحكاية تانية خالص باحسها امي اللي سنها قريب مني واختي الخبيرة بامور الحياة وصاحبتي الجميلة اللي مش ممكن استغنى عنها ابدا
لما ظرهت في حياتي كان فيه بنوته واحدة بتعب الدور ده معايا" هوبه" الجميلة لكن هي مش موجودة في مصر عايشة في ليبيا ولما ظهرت هنادي كانت برضه مش عايشة في مصر لكن بتنزل اجازات وكنت بافرح بالكم يوم الي بتكون فيهم هنا عشان بتعيشني حاية مختلفة قوي

شاعري معاها شبه مشاعري مع هوبه قوي مش باخاف منها خالص، باحكي كل حاجة بساطة وهدوء وصراحة حتى اكثر مني مع نفسي والغريب بقى ان بيرو جوزي حبيبي بيحبها قوي وبيرتاح لخروجنا معاها مع انه صعب جدا لما ده يحصل معاه لكن خير يلا ..
اخر خروجه سالت براء سؤال قدام نونا واحرجته قلت له اشمعنى هنادي بقى اللي مش بتتضايق من خروجنا وبتبقى

منسجم؟؟
وطبعا انا عارفه السبب بس قلت استغل الموقف بس الولد احرجني و قال لي وهبه كمان ولا نسيتي انها عاشت معانا

يومين في البيت وكنت ظريف قوي معاها، وساعتها فهمت قصده هو بيحب الناس اللي انا باحبهم قوي وبيحس معاهم بالامان والراحة
بحبها لكن مش عارفه هاعمل ايه من غيرها سنة كاملة لانها مسافر مانشستر ومش هترجع قبل سنة، هتوحشني...اه طبعا بس انا اللي شجعتها تمسك في البعثة باديها وسنانها ربنا يقدرني على بعدها ويديم علاقتنا على خي
أخر مرة خرجنا مع بعضر رحنا سينما مع فريق عشرينات شوفوا صورنا:

ننوشة مخضوضة

من اليمين...شيري..نونا...دودو...سالومي

فرحك تحفة يادودو

بيرو يشجعني على الرقص

براء يرقص ...يالهوي

علاء فرحان

ندا يفترس الجاتوه

سندوتش مش عارفه ايه لحد النهارده باكله لبيرو

جمع من الصحفيين

رقصها يا طاهر

دودو مندمجة في الرقص

خلود واميرة هشام

يوم مختلف..قضيناه جميعا في فرح دودو الحلوة في نادي الجلاء كان يوم الاربعاء اللي فات لكن كان أجمل يوم عدى علي من زمان قوي فرحة وحب وغنى ورقص ومشاعر لطيفة قوي ربنا يديمها على عائلتهم كلها يارب.

البت دودو كانت عروسة زي السكر وولاء اختها كمان كانت امورة قوي وعلاء كان منور الفرح وفضل يعيط قوي طبعا قمرين خارجين من بيتهم بس كان مبسوط قوي

اغرب حاجة حصلت في الفرح ده براء وتصرفاته كان فرحان قوي ومصر يرقص ويزقطط قوي وعمال يرقص بشكل غريب يا جماعة براء ولا بيعرف يرقص ولا بيحب الرقص ويوم فرحنا كانت اعجوبة انه وافق يرقص بعد ما كل الناس باست ايده ورجله ، كان فرحان قوي لدعاء وكل شوية يقول لي انا حاسس ان اختي بتتجوز

ندا وهواري رقصوا لما تعبوا ومصعب ورفعت لعبوا دور المتفرجين وطبعا دريني الرزين لم يهتز له جفن

انا بقى بصراحة كنت مقررة ارقص واغني واعمل كل الحاجات خصوصا اني لبست فستان كتب كتابي الذي م يكتب لي ان البسه يومها لان والدتي رفضت تماما اني البسه عشان بسيط قوي وكنت فرحانه به صحيح انه كان بقى ضيق حبتين لكن كانت اول مرة احس التغيير بعد الحمل بطني كبرت وبقى فيه بني ادم ودودو مكنتش تعرف اني حامل غير بعد ما رقصت واستغربت قوي وقالت لي خلاص كفاية بقى عشان النونو

خلود تطوعت وصورتنا بعد فقداننا كاميرا رفعت وموبايل مصعب ورفعت وهواري بسبب البطاريات

اليكم الصور

النهارده فرحها ياجدعان

دودو الحلوة فرحها النهارده، انا أول ما عرفت الخبر من يومين مصدقتش نفسي بسرعة كده ومن غير ما اساعدها في اي حاجة في جوازها مع انها اكثر واحدة وقفت جنبي، يا حبيبتي ياادودو هتدخلي الخية بدري يا روحي

كلمتني وقالت لي الخبر في نفس اللحظة اللي عرفت فيها الموضوع وقالت لي انها اشفقت علي من المشاوير لاني حامل وكفاية علي اللي انا فيه بس ده مش مبرر انا لسه كل ما اشوف الستاير افتكر اليوم الطويل اللي نزلنا فيه الازهر عشان نشتري الستاير وكان يوم حد ياحلاوة يعني أجازة المهم ربنا ستر وليقنا محل مفتوح واشترينا وروحنا

دودو بنت سكر قوي وجدعة قوي وحبوبة جدا وكلها مشاعر لطيفة بحبها قوي ولسه في بالي اليوم اللي رحنا فيه كلنا بيتهم اللي على طريق الاسماعيلية وعملنا غدا معتبر وكان يوم مالهوش حل ان شاء الله نكرره بقى بس المرة دي مع الاستاذ طاهر

امبارح كانت الحنة وكتب الكتاب، ودي اول مرة احضر فيها كتب كتاب مكنتش اعرف اللي بيحصل بس طلعت حاجة حلوة قوي قعدنا ندعي مع الماذون واحنا رافعين ايدينا لربنا وبعد ما كتبوا الكتبا حضنتها وكانت بتعيط قوي وكانها مش مستوعبة فكرتني بيوم فرحي بس انا عيطت متاخر شوية قبل ما اخرج من بيتنا على طول

بارك الله لهما وبارك عليهما وجمع بينهما في خير

غادة مع نفسها

قابلتها في مكان لم اتخيل ان يعرفني فيها احدهم فميكروباص الجمعية القميء كما اصفه دوما شهد لحظة هامة في حياتي ومشواري التدويني بالتحديد وخلوني احكي لكم الحكاية...

ركبنا ميني باص الجمعية العظيم وطبعا لانه جمعية لم اجد مكان بجوار زوجي العزيز فركبت بجوار سيدة في الكرسي الاول وامامي وقفت فتاة شعرت انني اعرفها ولاحظت انها تركز تفكيرها علي بشكل ملفت ...

المهم جلست الفتاة بعد ما بقى فيه مكات تقعد وشوية وغيرت مكانها وبقت قاعدة على طرف الكرسي اللي قصادي وركزت كده وقالت لي:"أنت دعاء وده براء صح؟" طبعا أنا اتسمرت مكاني وفضلت اعصف ذاكرتي عشان اعرف هي مين يمكن زميلتي في الجامعة، يمكن كانت ساكنه مدينة، يمكن قريبة حد اعرفه المهم معرفتش أبدا..

ولقيت براء بيرد ويقول لها ايوة وهي فرحت جدا وكملت كلام:"أنا غادة مع نفسي مدونة وباشوف صوركم على مدوناتكم وفرحانة قوي أني شفتكم"

أنا لقيتني بابتسم قوي لأنه فعلا حوار متخيلتش انه يحصل وقعدت أسالها عن مدونتها وحياتها وعرفت انها هتتجوز قريب وبتجيب حاجات الفرح وقعدنا نرغي كاننا نعرف بعض من زمن وفضلنا نتكلم لحد ما وصلنا واكتشفنا انها ساكنة في نفس شارعنا"شارع زغلول العظيم"

نزلنا من الميني باص وهم ركبوا عربية كفر الجبل واحنا خدناها مشي للبيت وكنا مبسوطين جدا وانا بجد اسفة اني مكتبتش من يومها بس فعلا غصب عني وحشتيني يا غادة ياحلوة

اسمع كلامأبوك وأمك

اسمع كلام أمك واسمع كلام أبوك ونفذ اللي يعجبك يا مان(يا ومان)
انا بقى هارد على تدوينة أبوك يا واد
طبعا هو عمال يرسم عليك وعايز يفهمك ان أمك ديكاتورية وانه ديموقراطي بس بقولك ايه اوعى تسمع كلام حد غير كلام نفسك

أحلم بك

يقولون أن المرأة تشعر بنوع جنينها وببعض تفاصيله حتى قبل أن يعرف الطبيب، اشعر انك هناك تسبحين في فضاء لم يعد جديد عليك فها هو الأسبوع العاشر لك في المكان ذاته ولازال إحساسي انك أنثى ..

أما أنا فأضع يدي على موضعك أتحسس وجودك وأتابع نبضك الذي يأتي بعد نبضي بثواني معدودة واشك كثيرا في انك قررت أن تغادريني وتختاري الفراق قبل أن أراك فتدمع عيناني وأعود أتحسسك من جديد فلا اشعر بك وبعدها مباشرة اشعر بالرغبة الشديدة في القيء فاعرف انك هناك وإنها الحيلة التي تفعلينها دوما لتعرفي مقدراك في قلبي ..

لم اعد اكتفي بهذه الطرق للاطمئنان عليك بل أصبحت احلم بك، أراك في منامي وأنت لازلت هناك وأتابع حلمي حتى تصلي إلى عالمنا وتحتلي مكان آخر ولكنه هذه المرة في شقتنا الصغيرة التي اخترناها أنا ووالدك واطمئن علي رضاك عنها وعن موقعها وارى تذمرك من هذا الدور العالي الذي نسكن فيه بدون مصعد وأحملك في دلال لأني اعرف السبب وراء هذه الشكوى فلك الحق ياعزيزتي ولكن اطمئني فهي بضع سنوات قليلة لن تصل إلى أصابع يدك الخمس ونغادرها ووقتها تصبحين قادرة على الاختيار معنا لشقتنا الجديدة بل لحجرتك أيضا...

وهذه المرة لن أمانع أن أعطيك أفضل الحجرات ولن ارفض أن تطل بلكونة حجرتك على جيران لديهم طفل يسليك ويلعب دور الحب الأول في حياتك...

بحبك وحشتيني(دودو)

ها قد صرت الآن بداخلي

دوما كنت انتظر هذه اللحظة التي سأعلم فيها بوجودك هنا في هذه المساحة الضيقة التي كانت ملكي وحدي قبل بضع أسابيع ، احلم بتلك المشاعر منذ كنت صغيرة أرى لحظة قدوم الأطفال إلى الدنيا وأتابع أصابعهم التي تعبث بجدار دنياهم الصغيرة والتي تخص والدتهم العزيزة ...

فرحت بك للغاية...لم أتمالك نفسي من الفرحة ولكني رحت اشعر بأشياء لم تمر بعقلي من قبل ولم أتخيلها أبدا...سامحيني يا عزيزتي فليس من السهل أن تعطي مساحة لا باس بها من بطنك إلى شخص آخر حتى لو كانت ابنتك القادمة ...

وسامحيني مرة أخرى فانا لازلت أتمتع بقدر كبير من أنانية البشر التي لم تعرفيها بعد ورغبتهم في الاحتفاظ بأشيائهم جميعها دون التخلي عن 2 سم فقط هي كل المساحة التي تشغلينها الآن .

سكتت وتعجبت واستنكرت على نفسي هذه المشاعر الغريبة فكيف لا أتحملك وكنت الغاية منذ البداية؟..

ولكني بدأت في استيعاب الموقف بسرعة وأصبحت اهتم بك أكثر من نفسي بكثير وكان هذه المساحة الصغيرة هي محور حياتي من الآن وصاعدا...

ألومك قليلا لأني متعبة، مرهقة، قلقة، لا اقدر على الأكل أو شرب اللبن وأعاني كثيرا في تناول تلك الحبات الصفراء( حمض الفوليك) لأنها تروقك كثيرا، أكره النوم وترك أبيك وحده يشاهد التلفزيون ولكنك تجبرينني على هذا رغما عني وهو لا يفهم كثيرا في أعراض الحمل فيرفض نومي لساعات وتركه وأقاوم النوم في مرات كثيرة ولكنك تنتصرين في النهاية فاسقط منه أمام التلفاز ويتركني لأنه يشعر بالشفقة على وعليك.

أعرف أنك ستسالين الآن لماذا أناديك بألفاظ الأنثى ولم افعل مثل أبيك العزيز وأتعامل على انك ذكر يرفع اسمه ويبقى ذكره في الدنيا، لا ادري ولكني اشعر انك أنثى مجرد شعور فقط ولا انوي التأكد من كونك أنثى أم ذكر إلا يوم ولادتك لأظل مشتاقة إليك 9 أشهر بالتمام والكمال...وصدقيني إذا كنت أنثى أو ذكر سأفرح بنفس القدر فأنت في النهاية جزء مني ومنه.

متعبة أنا للغاية وأتذكر كلام جدتك التي لم تسعها الفرحة عندما علمت بقدومك عندما قالت لي لن تعرفي قيمة الأم ولا غلاوتها إلا لما تحملي وتولدي" وهاأنا عرفت قيمتها وشعرت بتعبها من اجلي فقط منذ أول الشهور فماذا فيما تبقى من الشهور التسعة....

سامحيني على شكوتي ولكن سيأتي اليوم الذي تعرفين فيه قيمة والدتك فقط عندما تحملي وتلدي طفل كان في الأصل جزء من أحشائك..

احبك كثيرا وانتظرك بشوق واهتم بك قدر الإمكان ...اشرب اللبن رغم بغضي له، ابلع حمض الفوليك يوميا، أنام واترك والدك، اركب التاكسي في طريقي للمنزل خوفا عليك، اصعد سلالم بيتنا في هدوء وراحة زيادة في الأمان، لم اعد أطيق اللحوم والفراخ ولا الملوخية الخضراء ولكن يبدو انك ستصبحين مثل والدتك تفضلين الأسماك والملوحة والفسيخ لأنها توحشني كثيرا وتروقني وأنت بداخلي..ادعو الله ان يعينني على حملك ووضعك بسلام

أمك دودو( هاحبك تقولي لي دودو من غير تكليف)

جوزي تخين وبنضارة

فتى الأحلام أو الزوج المستقبلي له مواصفات خاصة نختزنها في عقولنا نحن البنات على مر السنين، وطبعا أهمها أن يكون وسيما، رشيقا، أنيقا، نظيفا..ولو قارننا الأوصاف السابقة سنجدها أشبه بنجوم السينما، يعني زمان البنت كانت تحب تتجوز واحد شبه أحمد رمزي أو رشدي أباظة، ودلوقتي تلاقيها بتحلم بشبيه أحمد السقا وهاني سلامة أو توم كروز.. لكن عمرنا ما شفنا واحدة بتحلم تتجوز واحد شبه "علاء ولي الدين" مثلا..!يمكن كل المواصفات اللي عند البنات كانت لدي مثلها تماما، فدوما كنت أحلم بهذا الشاب الوسيم الرشيق.. وكان من الممكن أن أتخلى عن الوسامة في سبيل الرشاقة، ولكن النصيب كان مختلفا تماما عن أحلامي، والغريب أنني تقبلت الأمر بل وأحببته بشدة

عشان يعيشمواقف كثيرة مررت بها منذ تقدم العريس الموعود بطلب الزواج مني، فلازلت أتذكر نظرة أمي لي بعد أول نظرة تلقيها على زوجي الحالي، ووجهها الذي انقلب ليتحول إلى اللون الأصفر بعدما فوجئت بحجمه الضخم وطوله الفارع، وقتها دخلت علّي غرفتي لتعلن رفضها للموضوع من بدايته لأنه "تخين" جدا ووشه "مكلبظ" قوي.وأخذت تذكرني بكل من سبقوه من المهندسين والدكاترة والمدرسين.. اللذين أطلقت عليهم أفظع الأوصاف.. فالأول رفيع قوي والثاني قصير زيادة عن اللزوم والأخير شعره أكرت..وقتها شعرت بالأسى لرأيها في زوجي المستقبلي، ولكن سرعان ما تغيرت النظرة بعد أول قعدة لها معه، لأنها غيرت رأيها كليا وأصبح هو الأقرب إليها من ابنها وخطيب أختي، وأصبح هو المؤدب الرشيق الجميل.. سبحان مغير الأحوال

..

الحمد لله الزيارة الأولى مرت بسلام.الزيارة الثانية كانت يوم الخطوبة والتي تجمع فيها الأهل والأقارب لمعاينة عريس بنتهم كما يحدث دوما، ولأننا فلاحين تبقي المعاينة عيني عينك، يعني كل الخالات والعمات والأعمام يحضرون ويباركون للعريس وأهله.يومها اختلفت ردود الأفعال ولكنها كانت جميعا تدور حول حجم العريس وإزاي إنه أخر صبر بنتهم، لكن أظرف تعليق سمعته يومها كان من عمتي.."حلو يا بنتي تخين تخين حلو..عشان ميدوبش من الزمن وعمايله"! ساعتها ضحكت من قلبي وأتذكر هذه الجملة كلما زرت عمتي وأذكرها بها أيضا
.

أما باقي فترة الخطوبة.. بدأت تعليقات الناس على جسم زوجي، فواحد يقول إيه العصفورة اللي جنب الفيل، والتاني مراية الحب بقى بس مش كثير عليكي ده، وغيرها من التعليقات السخيفة، وطبعا لأننا شعب ظريف بنحب الطرافة ورمي الافيهات عمال على بطال.أكثر الأشياء التي كانت تؤرقني في فترة الخطوبة وكتب الكتاب هي المواصلات، فزوجي يصر على ركوب التاكسي لأنه الوسيلة الوحيدة التي تحافظ على كرامته وتحرمه من افيهات وتعليقات الناس، لأن سواق الميكروباص يرفض الوقوف له لأنه تخين، والركاب ينظرون له بغضب لأنه يستولي على جزء كبير من الكرسي وغيرها من المواقف.وأحكي لكم عن أكثر المواقف التي غاظتني.. في مرة من مرات سفرنا لبلدتي -والسيارة البيجو هي وسيلة السفر لدينا- ركبنا السيارة في الكرسي الأخير اللي بياخد شخصين، بعد خمس دقائق وصل 3 ركاب رفيعين، السائق فجأة طلب من الركاب الموجودين ينزلوا لأنه مش طالع الدور ده وكنا أول النازلين، وبعد دقيقة ركب ركاب مكاننا في الكرسي الأخير، ساعتها فلت لساني مني وتركته على راحته مع السائق المستفز
.

صورة فرحكل بنت طبعا بتحلم بفستان الفرح والزفة والرقص مع عريسها، وصورة الفرح في الاستديو التي توزعها على صديقاتها من بابا المنظرة يعني..لكن زوجي يرفض الرقص ولا يحب مظاهر الزفة ولا الجلوس في الكوشة ولم يفعلها إلا بعد زن طويل من كل المحيطين بنا، أما الأدهى والأمر كانت صورة الفرح..

دخلنا الأستوديو، والمصور بدأ يظبط الكادر وكل مرة يكتشف إني قصيرة قوي ولا يوجد تناسب أبدا، وأخيرا توصل إلى حل جهنمي أنه يوقفني على كرسي وياخد كل الصور من الجنب لأن العريس تخين، ولو عملنا حركات العرسان المعتادة في الصور هتطلع الصور سيئة جدا، وبالفعل لم أحصل على صور "المنظرة" وبالرغم من ذلك وزعتها جميعا لأنه كان عريس زي القمر
.

وكمان طيب ورغم كل تلك المواقف فمازال هناك موقف واحد لا أستطيع نسيانه أبدا لأنه أقصر وأقرب وصف لزوجي العزيز، وهو الوصف الذي نصحه به صديقه الأنتيم "مصعب" عندما قرر أن يخبرني برغبته في الزواج..براء: تفتكر أقول لها مميزاتي إيه؟مصعب:وهو ده سؤال.. طبعا تقول لها تخين وبنظارة.والآن وبعد عامين من تجربتي مع زوجي التخين، خلصت إلى وصف آخر أقرب إليه هو "طيب وتخين وبنظارة" وهي الصفة التي يشترك فيها جميع البدناء، فجميعهم طيبون للغاية وقلوبهم رقيقة وتشبه كثيرا قلوب الأطفال.

من غيرك

من غيرك طعم الحياة مختلف، ماسخ وبارد وملهاش ملامح..؟

ليلة إمبارح ما جانيش نوم

مش عارفه ليه معرفتش انام امبارح خالص وكاني كنت في غيبوبة ومش حاسة براسي ولا بجسمي كله، رشا صاحبتي حبيبتي كانت عندي وقعدت تحكي لي عن حياتها صحيح عندها مشاكل كثيرة وكبيرة لكن انشغلت عليها قوي وحسيت انها مظلمومة وهشه والمشاكل دي ممكن تاثر عليها بعد ما جرحتها وخلتها حزينة....

رشا نزلت على الساعة 11 وكنت هاموت وانام قعدت اتفرج على برامج التلفزيوم من الشارة مساء الى 90 دقيقة وبعدها قررت اقرا شوية في شيكاغو ورحت في النوم لمدة ربع ساعة صحيت اطفي النور واشيل الرواية معرفتش انام لحد الساعة 3 وبعدين نمت وصحيت فجاة الساعة 4.15 قبل الفجر وبعدها بثانية لقيت براء بيكلمني ويقول لي انه عايزنا نصلي الفجر ونقول دعاء واحد في الصلاة الفكرة عجبتني قوي واستغربت ازاي عرف اني صاحية...

صليت ودعينا وبرضه مجانيش نوم لحد الصبح وفضلت احاول انام لحد السعاة ما بقة 10 الصبح قمت كويت هدوم وسبتها ولبست هدوم تانية خالص ونزلت الشغل

تفتكر هاقدر ؟؟

قاعد مأنتخ على كنبته المفضلة في البيت مع اللابتوب طبعا قبل الدش ما ييجي..بس عارف وحشتني

قلبي سافر امبارح لمدة اسبوعين وساب لي عقلي وبس ، عقل من غير قلب وامتحان خطير، وحدة، شغل، خوف، فراق، دنيا، ده احساسي بالظبط دلوقتي ، انا بجد حاسه احساس غريب قوي اني باقاوم نفسي باضغط علي عشان ابقى قوية، امبارح براء كان مسافر وانا كنت مشغولة قوي وعماله ابعد عن نفسي وعن عقلي فكرة الوحدة بس غصب عني فكرت فيه وقعدت اتخيل براء وهو ماشي جنبي كل يوم الصبح نتخانق نركب ميكروباص ولا ميني باص لجمعية ، ونتخانق عشان هو بيحب يفتح التلفزيون وانا باتخنق من تركيزه الكم ساعة اللي قاعدهم في البيت مع صور ناس تانية، واشد في شعري من رميه للهدوم والجزم في كل حتة في البيت،

للحظات ضعفت ولقيت عيني بتدمع غصب عني وانا كنت مقررة اني مش هاعيط وهو مسافر ولازم ابقى قوية لاني هاعيش لوحدي من غيره ومن غير ما يكون جنبي...

النهارده ركبت المترو بعد ميكروباص الجيزة لاول مرة في تاريخ جوازي معلش يابيرو بقى...كان نفسي اعمل كده بصراحة، يارب يرجع بسرعة وانا هاركب الميني باص من غير كلام

. بس تفتكر هاقدراتحمل بعدك؟؟

موزة هربت

موزة لونها أخضر وسكر لونه ابيض في لبني

ياتري عايشة ولا ميته جعانة ولا شبعانة مبسوطة ولا زعلانة ، ياحبيبتي يا موزة..هيء هيء هيء انا مدونتش من زمان كنت مشغووووووووووووووولة قوي قوي قوي مش عارفه حصل حاجات كثير تستحق ادون عنها والله كل يوم ابقى عايزة اكتب بس مقدرش وعشان الناس الخبيثة مش براء السبب بس اهو يعني الدنيا اتغيرت بس انا هاحاول ادون دايما ...

نيجي بقى لموضوعنا موزة الحلوة طبعا انتوا عايزين تعرفوا هي مين، دي عصفورتي الحلوة الجميلة اللي حموزة اخو براء جابها لنا هدية جوازنا هي مكنتش لوحدها طبعا هي وحبيبها سكر .

في يوم نسينا المسمار اللي عند البيت الخشب اللي المفروض انه بتاع البيض في القفص مش مقفول كويس وكنا بايتين بره ورجعنا لقينا الباب مفتوح وموزة مش موجودة وسكر زعلان وواقف مكانه.

زعلت قوي وقلبي اتقبض عشان سكر وعشان موزة قلقانة عليها قوي بس يمكن تبقى كويسه وحبه تعيش في حرية...الكلام ده حصل من يوم الاتنين

السؤال بقى انا ليه قررت اكتب عنها النهارده فيه سببين الاولاني ان براء سالني الصبح تعيشي لوحدك في الدنيا ولا مع حبيبك في قفص فقلت له مع حبيبي مش عارفه انا اخترت صح ولا غلط بس موزة اختارت تعيش لوحدها .

والسبب التاني اني جبت سكر معايا الشغل النهارده عشان ندور على حبيبة تعيش معاه في القفص بعد ما هربت موزة

عدنا

أقولها على طريقة القنوات الفضائية العربية "عدنا" الى كل ماكان ولكن المرة دي مع بعض نخرج الصبح ونرجع بالليل طبعا مش دايما ده اول يوم بس لكن النهارده مثلا هايخرج مع صحابه ويسيبني اروح لوحدي

اول يوم في الشغل كان بعد اسبوع واحد من الجواز طبعا الناس مش مصدقة نفسها ومزبهلين خصوصا بعد ما براء دخل ع النت يوم الفرح بالليل وبعد اسبوع نرجع الشغل، وطبعا اكيد قالوا علينا كلام عبي واتهمونا اتهامات تمس قدراتنا الانسانية لكن احنا حبينا نرجع الشغل وانا مش زعلانة خالص وحشتنا الحياة بكل ما فيها من تعب ومعاناة وشغل وناس وحركة وكمان براء كان عنده حاجة مهمة لازم يخلصها

اول يوم بقى كان مختلف خالص كاني في المدرسة ورايحة اول يوم باحلم من باليل ومحضرة الهدوم والجزمة الجديدة لكن اصعب ما في الموضوع هو اوزاي اصحى الصبح بدري عشان اروح الشغل خصوصا اني ساكنه في اخر شارع الهرم ومفيش مواصلة مباشرة للدقي عند شغلي وكمان مفيش فلوس للتاكسي كل يوم فلازم نصحى 7 الصبح وننزل على وريع مثلا نوصل 10 يعني بعد ميعادي بساعة وطبعا عداد الخصم شغااااااااااااااال

النهارده برضه حاولت اصحى الصبح مقدرتش خالص وقلت لبراء انزل انت انا هنام مش قادرة وهو طبعا زعل شوية وفضل مكسل وحتى لو مش هاروح لازم اقوم احضر سندوتشاته وهدومه وحاجاته وافضل صاحية لحد ما ينزل وطبعا فقت ومهنش علي ينزل لوحده فنزلت معاه وعندي نفس الاحساس العيال والمدرسة ومصعب سالني ع الماسنجر عامله ايه في تاني يوم شغل فقلت له زي العيال الصغيرين وتاني يوم في المدرسة

Happy birthday

Happy birthday الجملة السابقة هي رسالة وصلتني على موبايلي يوم فرحي الصبح ساعتها استغربت قوي وقلت مين العبيط اللي باعت لي يوم فرحي يقول لي هابي بيرس داي وانا مينفعش اعرف مين لان موبيلي اللي هو موبيل براء في الاصل وبدلناه مش بيجيب الرسائل بالاسماء المهم معرفتش مين ونسيت في الزحمة بتاعة يوم الفرح.

-2وانا في بيتنا يوم الفرح الصبح استغربت قوي اني عيطت ودموعي كترت وانا باودع اهلي وخصوصا امي واختي مع اني مكنتش عايشة معاهم اصلا وبقالي اكثر من 7 سنسن عايشة بره البيت وبزورهم قليل قوي بس يومها كان يوم مختلف قوي وفضلت اعيط وبراء مستغرب قوي ورفعت ومصعب ازبهلوا وصوروا اللي حصل كالعاده وساعتها براء فضل يضحك في لحد ما ضحكت.

-3 احساس غريب انك تعمل حاجاتك بنفسك طول عمري بيقولوا علي موفرة وست شاطرة لكن في فرحي كان فيه حاجات كثيرة قوي نفسي اعملها بنفسي لكن للاسف معرفتش اعمل غير كم حاجة كده بس طلعوا تحفة الحمد لله اهمهم بودي الفرح للي لبسته تحت الفستان لانه كان عريان شويتين وطرزته وطلع هايل وكمان "الكواف" الله يكرمها يسر هي اللي فهمتني يعني ايه الكواف وهو ببساطة للي ميعرفوش زي حلاتي سابقا هو الباندانا اللي بتبقى تحت الطرحة او قبل الطرحة وطرزته هو كمان الحمد لله طلع كويس بس احساسي كان حلو قوي وانا لابسه حاجاتي عملتها بايدي وعلى فكرة هم موجودين لاي حد محتاجهم اه نسيت اقول لكم ان الطرحة جدة براء هي اللي عملتها لي يعني تحت امركم طرحة وكواف وبودي ابيض.

-4 اول يوم اصحى من النوم باليل الاقي براء جنبي افتكرت تدوينة رضوى اللي عملتها بعد الفرح وكلامها عن الجواز حسيت احساس غريب قوي المرة دي اني خلاص بقيت حد تاني خالص غير دعاء بتاعة زمان يعني مبقتش انام لوحدي ولا اتغطى لوحدي على فكرة يا جماعة براء بيتقلب كثير قوي وكمان بسرعة وقوة غريبة وبيرمي الغطا يعني لازم تسالي قبل الجواز بيرمي الغطا ولا لا يا اما خلاص بقى كل واحد يتغطى لوحده.

5-اول خروجه بعد الفرح كانت يوم السبت تاني يوم يعني خرجنا الساعة 12 بالليل وقررنا ندخل سينما منتصف الليل وللاسف ملقيناش حفلة في كايرو مول ولا في سينما الهرم ونزلنا الدقي لعلنا نلحق سينما التحرير لقينا فيلم كشف حسا ب وكنا شفناه قبل كده فرحنا سوبر ماركت واشترينا طلبات البيت من الدقي وكان برضه احساس مختلف تماما.

6- -اول زيارة لاخويا لينا بعد الفرح كان مصر انه يقعد معايا انا لوحدي ويسالني عن براء ويعرف احنا مبسوطين ولا لا كانت مشاعري غريبة ومحرجة قوي من اخويا وكمان قريبة منه اكثر ونفس الشيء مع حماتي لكن بابا براء لقيتني مش واخده عليه عكس زمااااااان خالص ومش عارفه ليه لحد دلوقتي.

7- اول خروجه تنجح لي انا وبراء كانت اول امبارح ورحنا سينما بقى في سينما الهرم وشفنا 300 سبارتي وخلصنا قريب الفجر ورحنا مترو اتسوقنا والخروجة التانية كانت مع فريق عشرينات المبجل مصعب ورفعت ويسر وشيرين وعلي ومريم وهواري وحمزة اتقابلنا في فدركرز واكلت السلطة اللي بحبها وبراء شرب بيبسي ورفعت ومصعب صوروا لدرجة ان الناس اللي في المحل افتكروا رفعت اللهم احفظنا بس لحقنا ومشينا قبل ما الموضوع يكبر واحنا في المحل الدنيا مطرت بصيت لبراء وقلت له يبص ويدعي لان الدنيا بتمطر وفكرته ازاي كل مرة نيجي فيها هنا الدنيا تمطر كثير ومسكنا ايدينا في ايد بعض واتمشينا في المطر لحداول موقف ميكروباصات.

8- اول ناس يتعزموا عندنا في البيت كان مصعب ورفعت وياحرام مشيوا بسرعة قوي كان يوم السينما ويادوب كلوا فروت سالاد لكن اول عزومة بجد كانت النهارده مكنتش عامله حسابي بس الحمد لله ربنا ستر عملت لحمة وملوخية ورز وكان عندي باقي صينية بطاطس وكان فيه حمامة ونص وباقي مكرونة باشامل ومحشي وعيش وفروت سالاد تاني وكان غريب قوي اني بقيت ست بين بقى مع اني باحب المطبخ قوي بس غريبة المشاعر دي.

9-

نسيت اقول لكم حاجة مهمة قوي اني يوم حنتي كان يوم حلو قوي وغريب قوي في نفس الوقت يومها الجو كان حلو قوي والشمس طالعة وفجاة الدنيا مطرت بس مش مطر عادي ولا طبيعي زي مطر السنين اللي فاتت دي كانت بتمطر ثلج وكان فيه برد ورعد وسيول في البيوت في البلد وكان هو نفس ميعاد الكوافير بتاعي وكل الناس في البلد قالوا اني كنت لاحسه المغرفة يعني طفاسة يعني وده مثل بيتقال على العرايس اللي فرحهم بيبقى يوم مطرة .

وامي زعلت قوي لان الصباحية بتاعتي كانت هتغرق مكنوش مديين خوانه وكانوا حاطينها بره وكما المسرح والكوشة وكل الحاجات اتبلت وانا على العكس كنت فرحانة قوي وحاسه انه خير المهم رحت الكوافير ورجعت وتمام شوية والكهربا قطعت وانا في الكوشة قلت خير وقعدت اكلم براء شويتين والدي جي باظ ساعتها صعب علي الناس اللي لسه قاعدين.

10-

يوم الفرح انا قلت اتكلم عنه اخر حاجة عشان كان يوم غريب قوي انا كنت عروسة مركزة قوي قوي وواخده بالي من كل الناس وعلى رأي رفعت مفيش عروسة تعمل قرنين للمعازيم، فرحت قوي بوجود هنادي وعمرو ورضوى كان وجودهم فارق مايا قوي فعلا وفرحت اكثر بتدوينة رضوى الرائعة واهتمام عمرو المفكر الجامد كما نسميه ان يكتب عن فرحنا وكنت مشفقة على هنوده الحلوة لما عربيتها اتعطلت يوم الفرح وعملت المستحيل عشان تيجي...وفرحت بشيرين وعجم واستاذ على لانه عريس جديد وافتقدت هبه منى وليلى وهواري واستاذ عبدالله، اما فرقة المهام الصعبة دريني وفؤاد وندا وعلاء ودعاء واميرة واميرة هشام فدول طبعا واجب عليهم ييجوا...

بس الفرح كان مختلف تماما عن اللي رسمناه انا وبراء بس عدى على خير الحمد لله لكن اللي عرفته ان الواحد بيتنازل كثير قوي يوم فرحه وبيحاول ان اليوم يعدي وخلاص اه نسيت اقول لكم اهم حاجة يا جماعة المكياج بتاعي يسر الحلوة هي للي عملته لي وامي اول ما شفتني اتخضت عشان المكياج خفيف قوي لكن كل اصحابنا كانوا مبسوطين قوي شوفوا الصور وقولوا لي رايكم في التعليقات.

انا عايزة ادون من زمان قوي والله بس مش عارفه ليه معملتش كده واخر حاجة هاقولها لكم ان اللي بعت الرسالة اللي بتقول عيد ميلاد سعيد كان مصعب عرفت ده وهو جاي مع رفعت وبراء ياخدوني يوم الفرح وكان عنده حق الحياة بعد الجواز مختلفة خالص وكانك اتولدت من جديد.


ملاحظات:

التدوينة مكتوبة من يوم الجمعة بس النت كان فاصل
لمزيد من التفاصيل ممكن تقا تدوينة رضوى ورفعت وعمرو
الجوازمسئولية ومتحسبوش يابنات ان الجواز راحة

ابو رفعت....الواد الجن

كنت عايزة اكتب عنه من زمااااااااااااااان وبعدين قعدت أفكر اكتب ايه لقيت ان احسن طريقة اكتب بها عنه اني انشر صوره في كل حالاته اللي اسعدنا الحظ وشفناه فيها وابقى ضربت عصفورين بحجر واحد يعني سرقت منه فكرة التدوين المصور وكمان نور مدونتي.

هو شخص فظيع بكل المقاييس يعني لما تشوفه كده تحتار فيه وبعد ما تتعامل معاه تلاقيه حد طيوب قوي "رفعت السكره" زميلنا في الشغل بس مكناش واخدين على بعض وبعدين بصراحة مش فاكره غير انه كل يوم الصبح ييجي عشرينات يصبح علينا وعلى وشه ابتسامه هايلة وكل مرة اسال نفسي هو على طول بيضحك ليه ده اكيد تمثيل يعني ...
بعد كده رحنا دريم بارك مع بعض في الشركة وهناك انقلبت الموازين خالص رجعنا من الرحلة ورفعت صاحبنا كلنا ..

بعدها بكم شهر جه موضوع عملية الزايدة بتاعة مصعب ورفعت بصراحة كان اكثر واحد تعب فينا وفضل مراقب مصعب وواخد باله من كل حاجة خاصه به
.....بصوا انا مش هاحكي اتفرجوا انتوا بقى

اول مرة نشوفه على طبيعته في دريم بارك

مشغووووووووووول ومركز مع كل الناس

اللي ميعجبوش ميكلموش

فرقة دريم بارك للعزف الجماعي

طبعا اصحاب مصاعيبو ورفعت

محور الشر

المنسق العام لعملية الزائدة

في تعريف بمصاعيبو

يوم نقل عفشنا

في صالة بيتنا المتواضع مع ندا وعلاء

عقبال عنده يارب شايل كرسي السفرة

قاعد على الانتريه اللي قام بدور قومي في اصلاحه وعلى فكره احمد اول واحد يقعد ع الانتريه
قعدة انسجام مع المخدات

كشري على كنبة الانتريه عشان خاطر رفعت
في مناظره

في قعدة مع حاموزطبيب اسنان حضرته"دول صفين لولي"

في السويس قال ايه رايحين يتغدوا وراجعين

في مراية العربية في السويس

دايما تليفونه مشغول لو عايز تكلمه ومفيش معاك رصيد ابعت له كلمني شكرا عشان مبيردش ع الارقام الغريبة

أأأأأأأأأأأأه نسيت اقول لكم ان كل الصور اللي فوق التقطتها كاميرا رفعت اللي ميروحش مكان غير وهي معاه في كل حتة تلاقيه جحاهز شغااااااااااااااااال على راي يونيفرسال

كركور...يا يعيش

عمر اخو مصعب وهو في حضن كركورنا
كركور اول فرحتنا

كركور الحلو وجزء من الفوتيه وانا كنت تقريبا نايمة بعدسة رفعت

كركور الجميل....هو اسمه كده كركور بصراحة الفضل يرجع لبراء في اقتناء كركور الحلو الكميل التخين ده يومها كنت باشتري حاجات للبيت من سوبر ماركت الشريف وبعدين براء سابني سارحه في ملكوت الشمعدان والصواني وهو دخل قسم الاطفال وهاتك يافرجة وكل شوية انادي عليه يابراء من فضلك ممكن تقول لي رايك في الحاجة الفلانية وهو ولا على باله.

يومها ضحكت قوي مكنتش اعرف ان براء له في لعب الاطفال وقبلها بيوم كان عمال يتكلم ويقول مش لازم نخلف بعد الجواز انا لسه صغير وعايز استمتع بحياتي والكلام ده يومها قلب خالص وقال عايز اخلف حالا الللعب حلووة قو يانا عايزاخلف عيال عشان العب معاهم المهم طلعنا من السوبرماركت بكركور بعد محايلة وضغط على اعصابي من براء هو عارف اني باحب الدباديب قوي وانا عندي كثير قوي البيت تويتي وخوخه وقطط وعرايس كثير وارانب بس بصراحة ضعفت واشتريناه بمبلغ محترم يعني بس كان اول حاجة نشتريها عشان احنا عايزينها لينا نستمتع بيها من غير ما اي .حد يتدخل فيها ...على حد وصف براء في المحل وبعد ما شاتريناه قعدنا نفكر واطلقنا عليه كركور ليحتل مكان مميز في غرفة براء المفضلة(الانتريه) بين الفوتيهين اللي انا باحبهم ..باختصار انا باقول عليه اول فرحتنا..

الولد عمر بيحبه قوي وكل ماييجي عندنا يقعد يقنعني انه وحش قال يعني ممكن اسيبه له

حاااااااااااااااااسب ع النيش

النيش هو اللي على ايدك اليمين وانت في الصورة للاسف مكنش فيه كاميرا يوم الفرش هو واضح يعني بس مسيري اصوره لكم

انا مشغووووووووووووووووووولة قوي قو ي قوي سامحوني والله مش عارفه ادون مع اني عندي حكايات كثير قوي نفسي افضفض واحكيها بس بصراحة اهم موضوع شاغلني دلوقتي هو موضوع النيش اصلي عقبال عندكم كلكم يا بنات ويا ولاد فرشت الشقة يوم الخميس هي لسه مخلصتش فرش طبعا بس اهلي بقى راحوا اتفرجوزا وفرشوا الدولاب ووزعنا الدولاب بيني وبين براء واتخانقنا على مكان الهدوم وحركات العيال دي بس اكثر حاجة قلقانة عليها النيش ...1 اصل انتوا يمكن متعرفوش الحكاية اصل النيش ده فيه اعز ما املك فيه الصيني والاركوبال والكاسات والفناجين الحلوة وكمان فيه شنطة المعالق يا جماعة.

من يوم ما فرشنا وانا كل يوم احلم اني هاروح الاقي النيش وقع بكل الحاجات اللي فيه مع اني سمعت كلام امي وحطيت حاجات قليلة قوي فوق الرفوف الزجاج وحطيت الباقي كله تحت على الخشب بس برضه خايفة

المهم بقى يوم العفش براء ربنا يكرمه كان واقف معانا(عشان يعدل علينا طبعا اصل انتوا متعرفوش جوزي عنده اراؤه وحكاياته الخاصة) وشوية شوية بعد الغدا دخل اوضة الانتريه بعد ما فرشنا ونااااااااااااااام نوم عميق وانا فضلت اضحك وصعب علي قوي جبت اللحاف الفيبر الحلو وغطيته وسبته مصحيش غير لما خلصنا خالص

المهم ادعوا لي النيش ميقعش وكمان ربنا يهدي سري انا وبراء عشان بقالنا اسبوع بنتخانق وباعيط كثير قوي لدرجة اني قربت ادخل في حالة اكتئاب واول مرة اخاف من الجواز ومن الرجل في حياتي حاسه ان الموضوع مش زي ما كنت فاهمه ...بصوا هابقى احكي لكم تاني اصلي لازم انزل حالا

اسماعيلية والفول الحراتي

اسماعيلية....انا مكتبتش عنها غصب عني والله ده كان يوم اكثر من رائع انا رجعت وكاني واحدة تانية خالص لدرجة اني حاسه ان اللي فات ده مش اسبوع ده شهر الايام بعد يوم اسماعيلية ده بقى ستين يوم في بعض .

قبلها بيوم كنا في معكركة مسح الشقة وتنظيفها وطبعا دي معركة استمرت حتى منتصف الليل وبراء كالعادة باعني وسابني اغسل الارض واحك في السيراميك وقعد يغني لي " والله يازمن لا بايدينا زرعنا الشوك" ويقلب في الاغاني ع اللابتوب وكل ساعة كده ييجي يدلق دورق ميه المهم تعبت فعلا ومع ذلك صحيت بدري قوي لان الميعاد كان 9 الصبح عند المرج الجديدة وبالفعل صحيت 7 الصبح وبيرو اتصل وقال مش قادر اقنعته ونزلنا رحنا .

ووصلنا 10 المهم وصلنا اسماعيلية وبدات التفاصيل طبعا انا اول ما شفت الفول الحراتي زقططت من الفرحة ورحت اجمع الفول الجميل على فكرة يا جماعةو الاكل من ارض حد مش حرام لو انت جعان ده كلام امي الغالية وبعدها لقيت غيط بصل اخضر معرفتش امسك نفسي رحت قاطعة بصلاية وجبت رغيف عيش من الكيس اللي مع علاء وحطيت عليه كاتشب كان في شنطتي واكلت وكان طعمه هايل

وصلنا البيت والبهوات قعدوا يلبعوا فيفا وعاملين فيها في كاس العالم المهم طبعا بم اننا في مجتمع ذكوري(.....) بلا ش شتيمة عشان اليوم ده كان حلوي هم قعدوا يلعبوا واحنا دخلنا المطبخ وعينكم ما تشو الا النور اختكم اميرة دخلت في صراع مع صواع الكفته ودعاء فقدت الذاكرة

اه انتا نسيت اقول لكم ان اليوم ده كنا معزومين عليه من علاء باشا ودعاء اخته الكميلة اللطيفة دي، نكمل بقى دخلنا المطبخ وكل ما اسال دعاء على مكان حاجة تقول لي مش عارفه اسالي علاء كنت هاموت من الغيظ بس قعدت اضحك اصلي عارفه دودو الجميلة وطبعا الرسالة وصلت وعرفت ان مالهاش في المطبخ خالص بس الحق يتقال البت غلست المواعين كلها طبق طبق

اميرة شغالة يعني بتعرف تعمل حاجات لطيفة واا كنت زهقانة من نفسي قوي عشان باعرف اطبخ كان نفسي ابقى مبعرفش عشان ما ابقاش ام العيال بقى والست اللي عارفه خلصنا تتبيل الفراخ وتصبيع الكفتة وعمايل المكرونة والملوخية وهم لسه بيولوعوا النار كنت عايزة اولع فيهم لان الاكل اتاخر قوي على ما خلص

المهم اكلنا وشبعنا قوي والحمد لله وقعدنا نلعب لبعة الصراحة وانا مبطلتش لعب سوليتير فرصة بقى براء مشغول مع صحابه وقلنا كلام لطيف قوي وبالفعل الاراء كانت مفيدة ورجعنا يوميها كلنا بنحب بعض اكثر وفاهمين بعض اكثر بكثير قوي من قبل كده

ياخبر نسيت اخطر حاجة في اليوم خطبة الجمعة للشيخ الزنديق احمد ندا ...قال ايه اختاروا ندا يخطب وكانت شورة قال اربع كلمات مثلا والباقي سكوت والاربع كلمات ثناء وصلاة على النيبي صلى الله عليه وسلم وانا كنت هاموت من الضحك كنا البنات واقفين وراهم طبعا بس كنت هافطس بجد كانت خطبة هايلة بحيث ان الصلاة والخطبة وكل حاجة استغرقت على الاكثر 10 دقائق منهم 9 دقائق سكوت في الخطبة

بس يا خسارة اليوم كان ناقصة شوية ناس مهمين قوي قوي قوي على راسهم رفعت باشا طبعا بكاميرته الخفية اللي بترصد كل تحركاتنا ، وكان ناقصة هواري ولميا

بس بجد كان يوم رائع ان شاء الله يتكرر تاني وهواري ولميا ورفعت ييجوا معانا

باحب الورد

الدنيا برد الدنيا برد وعم خليل بيسقي الورد... سمعتها للمرة الاولى اليوم بصوت احمد منيب عرفت اسمه وسمعته مرات عديده ولكني لم اجرب احساس ان استمع الى صوته ، وقتها ايقنت لماذا اصبح محمد منير متميزا ولكني شعرت بان صوت منير استنساخ لصوت منيب لم احزن من اجل منير ولكني احترمته اكثر فمنيب يستحق هذا النقل بالكربون وان ظل صوت منيب شجيا اكثر من منير بكثير

وعندما وصلت الى اغنية الدنيا برد تذكرت وقتها الورد وهذه الحالة الغريبة التي امر بها فقررت ان ابحث عن الورد وقطفت لكم كم وردة كده يارب يعجبكم الورد، اصلي باحب الورد قوي قوي قوي قوي

مش عارفه ليه بافتكر الملايكة لما اشوف