الثلاثاء، مارس ٠٦، ٢٠٠٧

يا نجف بنور


يا نجف بنور يا سيد العرسان اه يا نجف حلو يا نجف" متفهموش غلط ده مش مطلع اغنية جديدة ولا قررت انافس الاستاذ عبد العزيز محمود دي اول حاجة جت في بالي يوم مغا اشترينا النجف" اصل احنا عقبال عندكم نزلنا درب البرابرة بعد صراع طويل مع زوجي الحبيب انه يفضي نفسه يوم نختار فيه النجف وقد كان بعد اسبوع من المحايلة والمطاردة والاتهام باني ست فاضية وان دماغه مش رايقة المهم نزلنا البرابرة واخترنا النجف .


كان من النوع اللي بيتركب فيه كريستالات كثير يعني نازل بحاجات كده شبه اللي فوق وبراء بصراحة اللي اختاره انا كان نفسي اجيب حاجة فيها شغل نحاس ولمبات بسيطة المهم اخترت نجفة اوضة النوم وجبت نجفة الصالة واوضة المكتب من ام حاجات نازلة مش عارفه اسمها ايه بيقولوا كريستال ( بس هو طبعا مش كريستال ولا حاجة قزاز يعني) المهم خدنا النجف ومشينا وكانت من غير تركيب الحاجات اللي نازله عشان براء كان مستعجل قوي وقلنا نركبها في البيت

وعينكم ما تشوف الا النور روحنا الشقة بعد جولة البحث عن تاكسي في العتبة ينفع يروحنا الهرم بالكوالين والستاير والنجف والبلتكانات فرصة بقى براء موجود.واهو كله بيعدي

...

فضلنا نركب في النجف لحد الساعة 12 بالليل مجهود فظيع بجد والله عيني تعبت قوي وبيرو زهق وقام يتمشى لان عدد القزاز ده مهول بس كان احساس حلو قوي انك تعمل حاجاتك بنفسك
لحد ما خلصنا وبراء صمم يركبهم ساعتها وقبل ما يركب اللي في الصالة نزلت على الارض واتدشدش القزاز بتاع النجفة وربنا ستر وكان فيه بتاع قزاز زيادة نعدل به اللي اتكسر عموما الموضوع عدى لكن براء قال ان النجفة اللي في الصالة لازم نكسرها قبل الجواز بدل ما انا خايفة عليها قوي كده-

هناك ١٥ تعليقًا:

Dananeer يقول...

مبررووووك
:)

عمرو عزت يقول...

ما تفكرينيش
كانت فترة مؤلمة جدا
فترة شراء الحاجات دي
بس عدت علي خير

و الحمد لله انتصرت في معركة النيش
شقتنا مافيهاش نيش
هاموت و انا فخور و اقول لاولادي اني اتجوزت و ماجبتش نيش و اوصيهم يكملوا المسيرة

اما بخصوص النجف
فانا قلبي مع براء
قعدتوا ركبتوا كل النجفة دي
انا عارف معظم البنات بيحسوا ببهجة و هما بيعملوا التفاصيل دي

انا وصلت مع رضوي لصفقة مرضية
انا كنت عاوز اركب لمبات فلورسنت زي بتاعة المكاتب و خلاص
عملية و قوية و رخيصة
رضوي كانت عاوزة حاجة تانية مش عارف هي ايه
و في الاخر اشترينا نجفتين للصالة عبارة حاجة كده فضلة خيرك زي زعلتين مقلوبين و جوا كل واحدة لمبة و السلام

الحمد لله
فترة و مرت بخير
عقبالكم لما تخلّصوا و تخلصوا

shabfa2re يقول...

احمدك يارب
الطول هيبة
اركب اى نجفة وانا واقف ع الارض

ام مليكة يقول...

هههههههههه
ماشي يا عمرو بتقوي براء علي هو مش ناقص اصله قوي من غير حاجة بس قلبي معاكي يا حبيبيتي تتجوزي من غير نيش
الله يبارك فيكي يا دنورة يا حبيبتي

Abd El Rahman Magdy يقول...

ألف مبروك
وربنا يسعدكم

محمد حمدي يقول...

مبروك عليكم وعقبال متفرشو الفيلا :)

أنا الصراحه مش عارف هعمل إيه لما أوصل لمراحل النجف دى ... يا هكون فلست يا هكون إنتحرت ... تنصحى بإيه طيب بعد ما مريتى بالتجربه دى ؟ أفيدونا أفادكم الله :)

مبروك كمان مرة

محض روح يقول...

الف مبروك ياجميل
بس تفتكرى ليه براء عايز يكسر النجفه بتاعت الصاله قبل الجواز

ده مثلا نوع من انواع الامان
ولا انتى شيفه ايه

:)

ام مليكة يقول...

ايه السؤال المحرج اللي فوق راسي على طول ده مش عارفه بصوا انا هاعتبر ان ده تهديه لنفوس

walaaz يقول...

دعاء
ربنا يخلى كل تفاصيلكم المشتركة جميلة دايما

بس أنا مش بعلق عشان النجف..عشان فيديو (حبك حرية ) من بدرى عايزة أقولك قد ايه جميل وأشكرك عليه انت وبراء

bagabigo يقول...

الف مبروك

shabfa2re يقول...
أزال المؤلف هذا التعليق.
shabfa2re يقول...

ممكن اعرض خدماتى
انا طويل
طويل اوى
وممكن اساعدك مفى تعليق اى حاجة
انا بتكلم جد
سلام

elkamhawi يقول...

انتو مشترتوش حاجة بعد النجف ولا اية؟؟؟؟؟؟؟؟

Camellia Hussein يقول...

ألف مبوك ربنا يبارك لكم ويتمم بخير

LAMIA MAHMOUD يقول...

مبروك النجف يا عروسة .. ومبروك الشقة .. ها حنفرش امتى:)